’اگر کہیں جنت ہے تو یہیں ہے، پھر سے وہی کشمیر بنانا ہوگا‘: چیف جسٹس بی آر گوئی

چیف جسٹس آف انڈیا (سی جے آئی) بی آر گوئی نے اتوار، 27 جولائی کو سرینگر کے ’ایس کے آئی سی سی‘ میں منعقدہ نیشنل لیگل سروسز اتھارٹی (این اے ایل ایس اے، نالسا) کی شمالی علاقائی کانفرنس سے خطاب کرتے ہوئے کہا، ’’اگر زمین پر کہیں جنت ہے، تو یہیں ہے، یہیں ہے، یہیں ہے لیکن اسے پھر سے وہی پرامن اور ہم آہنگ کشمیر بنانا ہوگا، جہاں سبھی طبقات کے لوگ باہمی احترام اور بھائی چارے کے ساتھ زندگی گزارتے تھے۔‘‘

اپنے خطاب میں سی جے آئی نے ججوں اور وکلاء کو مخاطب کرتے ہوئے کہا کہ ملک کے آخری شہری تک انصاف کی رسائی کو یقینی بنانے کے لیے عدالتی برادری کو یکجا ہو کر کام کرنا ہوگا۔ انہوں نے زور دیا کہ نالسا اسی مقصد کے لیے سرگرم ہے اور اس کے دائرۂ کار کو دور دراز علاقوں تک پہنچایا جا رہا ہے، چاہے وہ لداخ ہو، شمال مشرق ہو یا راجستھان۔ انہوں نے کہا، ’’جب تک لوگوں کو اپنے حقوق کا علم نہیں ہوگا، تب تک وہ حقوق بے معنی ہیں۔ علم کے بغیر حقوق بے کار ہیں۔‘‘

چیف جسٹس گوئی نے جموں و کشمیر کی گزشتہ تین دہائیوں کی صورتحال کی طرف اشارہ کرتے ہوئے اعتراف کیا کہ ’’کچھ بے ضابطگیاں ہیں جنہیں دور کرنے کی ضرورت ہے۔‘‘ انہوں نے اُمید ظاہر کی کہ ججوں اور وکلاء کے درمیان ایسا مکالمہ ایک نئے نقطۂ نظر کو جنم دے گا۔

انہوں نے کہا، ’’ہم نے آئین کے ذریعے خود سے سیاسی، سماجی اور معاشی انصاف کا وعدہ کیا ہے اور یہ ہماری ذمہ داری ہے کہ انصاف کو اس کی اصل روح کے مطابق نافذ کریں۔‘‘

چیف جسٹس نے بابا صاحب بھیم راؤ امبیڈکر کو خراجِ عقیدت پیش کرتے ہوئے کہا کہ انہوں نے ’ایک شخص، ایک ووٹ‘ کے اصول کے تحت سیاسی انصاف کو مضبوط کیا اور ساتھ ہی سماجی تقسیم کے چیلنجوں پر بھی روشنی ڈالی۔

آخر میں سی جے آئی گوئی نے کہا کہ عدالتی برادری کو آئین کی حقیقی اقدار کا امین اور محافظ ہونا چاہیے اور ان اقدار کو عوامی سطح پر پہنچانا وقت کی اہم ترین ضرورت ہے۔