پٹنہ میں بھیانک سڑک حادثہ، ٹرک نے آٹو کے پرخچے اڑائے، 8 لوگوں کی موت، کئی زخمی

بہار میں پٹنہ ضلع کے دنیاواں علاقے میں ہفتہ کی صبح ایک بڑا سڑک حادثہ پیش آیا۔ یہاں ٹرک نے ایک آٹو کو زوردار ٹکر مار دی جس سے اس کے پرخچے اڑ گئے۔ اس خوفناک حادثے میں 8 لوگوں کی موت ہو گئی جبکہ 7 دیگر افراد شدید طور سے زخمی ہو گئے۔ پولیس معاملے کی تفتیش میں لگ گئی ہے۔

ذرائع سے ملی اطلاع کے مطابق ہلسا کے ملامہ گاؤں کے لوگ آٹو میں سوار ہوکر گنگا اسنان کرنے گئے تھے۔ صبح گنگا اسنان کے بعد سبھی آٹو میں بیٹھ کر لوٹ رہے تھے تبھی آٹو شاہجہاں پور تھانہ علاقہ کے دنیاواں کے پاس پہنچا ہی تھا کہ ایک تیز رفتار ٹینکر نے آٹو کو زوردار ٹکر مارتے ہوئے اس کے پرخچے اڑا دیے، جس میں 8 لوگوں کی جان چلی گئی۔

حادثے کے بعد ٹرک ڈرائیور گاڑی سمیت فرار ہو گیا۔ مقامی لوگوں نے پولیس کو واقعہ کی اطلاع دی۔ موقع پر پہنچ کر پولیس نے راحت اور بچاؤ کام شروع کیا۔ زخمیوں کو فوراً قریبی اسپتال میں داخل کرایا گیا جہاں شدید طور سے زخمی لوگوں کو پٹنہ میڈیکل کالج اسپتال (پی ایم سی ایچ) منتقل کر دیا گیا۔

پولیس کے مطابق حادثے میں جان گنوانے والے سبھی لوگ نالندہ ضلع کے ہلسا تھانہ علاقے کے ملامہ گاؤں کے رہنے والے تھے۔ پولیس نے مہلوکین کو پوسٹ مارٹم کے لیے بھیج دیا ہے اور ٹینکر ڈرائیور کی تلاش تیز کر دی ہے۔ سی سی ٹی وی فوٹیج کھنگالے جا رہے ہیں۔ حادثے کی سنگینی کو دیکھتے ہوئے سینئر افسران بھی موقع پر پہنچے اور حالات کا جائزہ لیا۔

اس واقعہ کے بعد پورے ملامہ گاؤں میں سوگ کی لہر دوڑ گئی ہے۔ گاؤں کے لوگ صدمے میں ہیں اور مہلوکین کے اہل خانہ کا رو رو کر بُرا حال ہے۔ حادثے کے شکار لوگوں میں خواتین اور بچے بھی شامل بتائے جا رہے ہیں۔ انتظامیہ نے یقین دہانی کرائی ہے کہ متاثرین کنبہ کو ہرممکن مدد فراہم کرائی جائے گی۔