شدید بارش سے پانی پانی ہوا کولکاتا، ٹرین و فضائی خدمات متاثر، کرنٹ لگنے سے 7 لوگوں کی موت

مغربی بنگال کی راجدھانی کولکاتا اور اس کے آس پاس کےعلاقوں میں پیراور منگل کی درمیانی رات ہوئی موسلادھار بارش سے عام زندگی درہم برہم ہو کر رہ گئی ہے۔ کئی علاقوں میں گھٹنوں تک پانی بھر گیا ہے جس سے آمد ور فت زبردست اثر پڑا ہے۔ بارش سے کئی سڑکیں زیر آب ہیں۔ گھروں اور رہائشی احاطوں میں پانی داخل ہو چکا ہے۔

کئی جگہوں پر تین فٹ تک پانی بھر گیا ہے جس سے ریلوے پٹریاں ڈوب گئی ہیں۔ اس کے علاوہ میٹرو سروس میں بھی کافی دقتیں آ رہی ہیں۔ شدید بارش سے علاقوں میں پانی بھرنے سے اس میں کرنٹ اترنے کی بات بھی سامنے آئی ہے۔ بجلی کرنٹ لگنے سے اب تک 5 افراد کی موت ہو چکی ہے۔

کولکاتا میٹرو ریلوے بلیو لائن کے درمیانی حصہ، خاص طور سے مہانائک اُتم کمار اور رویندر سروور اسٹیشنوں کے درمیان پانی بھرنے سے خدمات روک دی گئیں۔ میٹرو ترجمان نے بتایا کہ مسافروں کے تحفظ کے لیے شہید کُھدی رام بوس اور میدان اسٹیشنوں کے درمیان خدمات معطل کر دی گئی ہیں جبکہ دکچھنیشور سے میدان تک محدود خدمات چل رہی ہیں۔ جلد ہی معمول کے مطابق خدمات شروع ہونے کی امید کی جا رہی ہے۔

مشرقی ریلوے کے ایک افسر نے بتایا کہ سیالدہ جنوبی حصہ میں ٹریک پر پانی بھرنے سے ٹرینوں کی آمد و رفت بُری طرح بند ہے۔ سیالدہ شمال میں برائے نام خدمات بحال ہیں۔ ہوڑہ اور کولکاتا ٹرمینل اسٹیشنوں کی ٹرینیں بھی متاثر ہوئی ہیں اور چت پور یارڈ میں آبی جماؤ کی وجہ سے سرکلر ریلوے لائن پر بھی ٹرینیں رکی ہوئی ہیں۔ وہیں اس بارش نے فضائی خدمات پر بھی کافی اثر ڈالا ہے۔ کولکاتا ہوائی اڈے پر پانی جمع ہو گیا ہے جس سے طیاروں کی آمد و رفت متاثر ہوئی ہے۔ انڈیگو ایئر لائنس نے شدید بارش کو دیکھتے ہوئے ٹریول ایڈوائزری جاری کی ہے۔

شہر کی سڑکوں پر شدید آبی جماؤ نے آمد و رفت کو بُری طرح ٹھپ کر دیا ہے۔ دفتر جانے والوں کو پبلک ٹرانسپورٹ کی کمی اور ٹریفک جام کی وجہ سے بڑی پریشانی کا سامنا کرنا پڑ رہا ہے۔ کئی اسکولوں نے شدید بارش اور آبی جماؤ کی وجہ سے چھٹی کا اعلان کر دیا ہے۔

کولکاتا میونسپل کارپوریشن کے مطابق توپسیا میں 275 ملی میٹر اور بلّی گنج میں 264 ملی میٹر بارش درج کی گئی جبکہ کولکاتا کے تھان ٹانیا میں 195 ملی میٹر بارش ہوئی۔ دُرگا پوجا کے موقع پر ہو رہی شدید بارش سے تہوار پر بھی اس کا کافی اثر پڑ رہا ہے۔

وہیں محکمہ موسمیات (آئی ایم ڈی) نے وارننگ دی ہے کہ شمال مشرقی بنگال کی خلیج میں بنے کم دباؤ والے علاقہ کی وجہ سے جنوبی بنگال کے کئی ضلعوں میں شدید بارش ہو سکتی ہے۔ بدھ تک پوربا اور مغربی میدنی پور، جنوبی 24 پرگنہ، جھارگرام اور بانکورا جیسے جنوبی بنگال کے ضلعوں میں شدید بارش کا امکان ہے۔ اس کے علاوہ 25 ستمبر کے آس پاس مشرق-وسط اور شمالی بنگال کی خلیج میں ایک کم دباؤ والا علاقہ بننے کا اماکن ہے جس سے بارش کا دور بڑھ سکتا ہے۔