دہلی کی ’زہریلی‘ ہوا کے درمیان کہرے کے الرٹ سے خدشات میں اضافہ! شدید سردی کے لیے رہیں تیار

راجدھانی میں آلودگی کی مسلسل بڑھتی سطح نے لوگوں کی مشکلات میں بھی اضافہ کر دیا ہے۔ بچوں اور بوڑھوں میں آنکھوں میں جلن، سانس لینے میں دشواری اور کھانسی اور بخار کے معاملات تیزی سے بڑھ رہے ہیں۔ ڈاکٹروں نے لوگوں کو مشورہ دیا ہے کہ وہ گھر سے باہر کی اپنی سرگرمیاں محدود کریں اورماسک پہنیں۔

وہیں موسم کی بات کریں تو دہلی میں سردی بڑھ گئی ہے۔ ہندوستان کے محکمہ موسمیات کے مطابق راجدھانی میں زیادہ سے زیادہ درجہ حرارت 26.7 ڈگری سیلسیس ریکارڈ کیا گیا اور کم سے کم درجہ حرارت 10.4 ڈگری سیلسیس تھا، جو معمول سے ایک ڈگری کم ہے۔ اسی طرح شام 5:30 بجے ہوا میں نمی کی سطح 68 فیصد تھی۔ تاہم خیال کیا جا رہا ہے کہ نومبر کے آخری دنوں اور دسمبر کے پہلے ہفتے میں شدید سردی پڑ سکتی ہے۔

محکمہ موسمیات کی جانب سے پیر کو دہلی میں کہرے کے الرٹ نے بھی تشویش کو بڑھا دیا ہے۔ پیر کو درمیانے درجے کا کہرا پڑنے کی پیش گوئی کی گئی ہے، زیادہ سے زیادہ اور کم سے کم درجہ حرارت بالترتیب 25 اور 10 ڈگری سینٹی گریڈ رہنے کا امکان ہے۔ بتادیں کہ سی پی سی بی کے معیارات کے مطابق صفر سے 50 کے درمیان اے کیو آئی کو ’بہتر‘مانا جاتا ہے جبکہ 51 سے 100 کو ’اطمینان بخش‘، 101 سے 200 کو ’امعتدل‘، 201 سے 300 کو ’خراب‘، 301 سے 400 کو ’بہت خراب‘اور 401 سے 500  کو ’سنگین‘ مانا جاتا ہے۔