گجرات: ٹرین حادثہ میں 3 شیروں کی موت، گزشتہ 3 مہینوں میں تقریباً 35 ہلاکتیں

امریلی: گجرات کے امریلی ضلع کے ساور کنڈلا علاقے میں بورامالا گاؤں کے نزدیک گری کے جنگل میں ایک مال گاڑی سے کٹ کر تین شیروں کی موت ہوگئی۔

محکمہ جنگلات کے ترجمان اور جوناگڑھ کے چیف سپروائزر ڈی ٹی بساواڑہ نے آج یو این آئی کو بتایا کہ کل دیر رات تقریبا پونے ایک بجے یہ حادثہ پیش آیا جب ایک گروپ کی شکل میں چھ شیر پٹری سے گذررہے تھے۔ ان میں سے ڈیڑھ سے دو سال کی عمر کے دو نر اور تقریبا ڈیڑھ سال کی ایک مادہ شیرنی کی کٹ کر موت ہوگئی۔ مال گاڑی بوٹاد سے پی پاواؤ جارہی تھی۔

بساواڈا نے بتایا کہ اس حادثے کی جانچ کا حکم دے دیا گیا ہے۔ اس بات کی بھی جانچ کی جارہی ہے کہ مال گاڑی کی رفتار حادثے کے وقت کیا تھی۔ اس کے علاوہ محکمہ جنگلات کے ملازمین اور شیروں کی رفتار پر نظر رکھنے والے ٹریکروں کی لاپرواہی کی جانچ کی جارہی ہے۔ قصورواروں کے خلاف سخت کارروائی کی جائے گی۔

گجرات کے سوراشٹر علاقے میں تین اضلاع جوناگڑھ، گری سومناتھ اور امریلی میں 1800 مربع کلومیٹر سے زیادہ علاقے میں پھیلے گری کے اس جنگل میں 2015 کی شیروں کی اعدادوشمار کے مطابق 523 تھی۔ یہ دنیا میں ایشیائی شیروں کی ایک واحد پناہ گاہ ہے۔