گجرات الیکشن: راہل نے کہا- ووٹ ڈال کر جمہوریت کے اس تہوار کو کامیاب بنائیں، کانگریس صدر کھڑگے نے بھی کی ووٹ دینے کی اپیل

گجرات اسمبلی انتخابات کے پہلے مرحلے کی ووٹنگ آج صبح 8 بجے سے جاری ہے۔ ووٹنگ شام 5 بجے تک ہوگی۔ سخت حفاظتی انتظامات کے درمیان ووٹ ڈالے جا رہے ہیں۔ اس دوران کانگریس لیڈر راہل گاندھی نے عوام سے اپیل کی ہے۔ انہوں نے ٹوئٹ کر کے کہا کہ گجرات کے تمام بھائیوں اور بہنوں سے اپیل ہے، ووٹ دیں… روزگار کے لیے، سستے گیس سلنڈر کے لیے، کسانوں کے قرضے معاف کرنے کے لیے، گجرات کی ترقی اور مستقبل کے لیے، بڑی تعداد میں ووٹ دیں اور اس جمہوریت کے فیسٹیول کو کامیاب بنائیں۔

دوسری طرف کانگریس کے صدر ملکارجن کھڑگے نے کہا کہ ’’گجرات کے 7 کروڑ لوگ تبدیلی کے لیے متحد ہیں۔ ووٹنگ میں حصہ لینا جمہوریت کی روح ہوتی ہے۔ بہت سے نوجوان دوستوں کو خوش آمدید کہتے ہیں جو اس بار گجرات میں پہلی بار ووٹ ڈال رہے ہیں۔

بتادیں کہ انتخابات کے پہلے مرحلے میں 39 سیاسی جماعتوں کے 788 امیدوار میدان میں ہیں۔ ان میں 70 خواتین بھی شامل ہیں۔ اس مرحلے میں کل دو کروڑ 39 لاکھ 76 ہزار 670 ووٹرز اپنے حق رائے دہی کا استعمال کریں گے۔ ان میں سے 12433362 مرد، 11542811 خواتین اور 497 ٹرانس جینڈر ووٹرز ہیں۔ اس الیکشن میں پہلی بار ووٹ ڈالنے والے 18 سے 19 سال کے نوجوان ووٹرز کی تعداد 574560 ہے۔ 99 سال سے زیادہ عمر کے 4945 ووٹرز ہیں۔

بتا دیں کہ گجرات میں دو مرحلوں میں ووٹنگ ہونی ہے۔ پہلے مرحلے کی پولنگ یکم دسمبر یعنی آج ہو رہی ہے جبکہ دوسرے مرحلے کی پولنگ 5 دسمبر کو ہونی ہے۔ دوسرے مرحلے میں 83 نشستوں کے لیے 833 امیدواروں کی مہم 3 دسمبر تک جاری رہے گی۔ جبکہ نتائج کا اعلان 8 دسمبر کو کیا جائے گا۔