راجستھان میں نوے لاکھ لوگوں کو پنشن مل رہی ہے– گہلوت

راجستھان کے وزیر اعلی اشوک گہلوت نے ریاست کی ہمہ جہت ترقی کے لئے ریاستی حکومت کو پرعزم بتاتے ہوئے کہا کہ عوامی بہبود اسکیموں کے ذریعہ آخری شخص تک صحت، خوراک، تعلیم، پینے کا صاف پانی، سماجی تحفظ پہنچ رہا ہے اورآج ریاست میں 90 لاکھ لوگوں کو پنشن مل رہی ہے جبکہ چھ لاکھ کسانوں کا بل صفر ہو گیا ہے۔

اشوک گہلوت کل ضلع ڈونگر پورکے ساگواڑہ سب ڈویژن واقع گیان پور میں کسان اور پاٹیدار سماج کے مہا سمیلن سے خطاب کر رہے تھے۔ انہوں نے کہا کہ راجستھان ملک کی پہلی ریاست بن گئی ہے، جس نے کسانوں کے مفاد میں الگ سے زرعی بجٹ کو پیش کرکے پچھلے بجٹ سے دوگنا بجٹ رکھا ہے، جس میں 89 ہزار کروڑ روپے کا التزام کیا گیا ہے۔

گہلوت نے کہا کہ ریاستی حکومت نے تقریباً 22 لاکھ کسانوں کے قرض معاف کئے ہیں۔ کسان دوست اسکیم کو نافذ کرکے کسانوں کو بڑی راحت فراہم کی گئی ہے اور دودھ پیدا کرنے والوں کو سبسڈی دے کر مویشی پالنے والوں کو فائدہ پہنچایا گیا ہے۔ انہوں نے کہا کہ ڈونگر پور ضلع میں کئی فلاحی اسکیموں سے عام لوگوں کو فائدہ پہنچایا جا رہا ہے، ساتھ ہی بینیشور دھام سمیت کئی اہم ترقیاتی کام ہو رہے ہیں۔ بچوں کو انگریزی تعلیم فراہم کرنے کے لیے مہاتما گاندھی انگلش اسکول بھی کھولے گئے ہیں۔