جھارکھنڈ کے سابق وزیر اعلیٰ چمپئی سورین کی طبیعت بگڑی، جمشیدپور واقع اسپتال میں داخل

جھارکھنڈ کے سابق وزیر اعلیٰ اور سرائے کیلا سے بی جے پی رکن اسمبلی چمپئی سورین کی طبیعت جمعہ کے روز اچانک بگڑ گئی۔ اس کے بعد انھیں جمشید پور واقع ٹی ایم ایچ (ٹاٹا مین ہاسپیٹل) میں داخل کرایا گیا ہے۔ فی الحال ان کی طبیعت پہلے سے بہتر بتائی جا رہی ہے۔ ماہر ڈاکٹرس کی ٹیم چمپئی سورین کی صحت پر نظر رھے ہوئی ہے۔

بتایا جا رہا ہے کہ جمعہ کے روز ہائی بلڈ پریشر اور دست سے جڑی پریشانیوں کے بعد چمپئی سورین ہاسپیٹل پہنچے۔ ابتدائی جانچ اور علاج کے بعد ان کی حالت اب پہلے سے بہتر بتائی جا رہی ہے۔ شام میں ایک بار پھر ان کی صحت سے متعلق جانچ کی بات کہی گئی، جس کے بعد بلیٹن جاری کیا جا سکتا ہے۔

چمپئی سورین نے سوشل میڈیا پلیٹ فارم ’ایکس‘ پر اپنی طبیعت کے بارے میں عوام کو جانکاری دی۔ انھوں نے اس پوسٹ میں لکھا ہے کہ ’’صحت سے متعلق پیچیدگیوں کے سبب آج صبح مجھے ٹاٹا مین ہاسپیٹل (جمشیدپور) میں داخل کیا گیا ہے۔ ڈاکٹروں کے مطابق فکر کی کوئی بات نہیں ہے۔ اب کافی بہتر محسوس کر رہا ہوں۔ امید کرتا ہوں بہت جلد مکمل طور پر صحت یاب ہو کر آپ سبھی کے درمیان واپس آؤں گا۔‘‘

بی جے پی کے جھارکھنڈ پردیش صدر بابولال مرانڈی نے چمپئی سورین کی جلد صحت یابی کے لیے دعا کی ہے۔ انھوں نے ’ایکس‘ پر لکھا ہے کہ ’’ایشور سے آپ کی بہتر صحت کے لیے دعا کرتا ہوں۔ آپ جلد از جلد صحت مند ہو کر پھر سے عوامی خدمت کی راہ پر چلیں، ایسی خواہش ہے۔‘‘