خارجہ سکریٹری وکرم مسری آج سے تین روزہ امریکی دورے پر، کئی امریکی سینئر افسروں سے ملاقات متوقع

خارجہ سکریٹری وکرم مسری منگل سے امریکہ کے تین روزہ دورے پر رہیں گے۔ وزارت خارجہ نے بتایا کہ فروری میں وزیر اعظم نریندر مودی کے واشنگٹن دورہ کے بعد مسری امریکہ کا دورہ کر رہے ہیں۔ وزارت کے مطابق وکرم مسری 27 سے 29 مئی تک واشنگٹن ڈی سی کے دورہ پر رہیں گے۔ اس دوران ان کی امریکہ انتظامیہ کے سینئر افسروں سے ملاقات اور کئی اہم میٹنگیں ہوں گی۔ دورہ میں ہند-امریکہ دوطرفہ تعلقات کے اہم شعبوں دفاعی تعاون، کاروبار، جدید ٹکنالوجی اور عالمی اسٹریٹیجک معاملوں پر بات چیت متوقع ہے۔

وکرم مسری کے امریکی دورہ کے تعلق سے وزارت خارجہ کی طرف سے جاری بیان میں بتایا گیا، ’’یہ دورہ فروری میں وزیر اعظم کے امریکی دورہ کے بعد ہو رہا ہے۔ فروری میں دونوں فریقوں نے 21ویں صدی کے لیے ہند-امریکہ کامپیکٹ (فوجی ساجھیداری، تیز رفتار کاروبار اور ٹکنالوجی کے مواقع کو فروغ دینا) شروع کیا تھا۔‘‘

واضح رہے کہ جنوری میں صدر ڈونالڈ ٹرمپ کے ذریعہ دوسری مدت کار کی ذمہ داریاں سنبھالنے کے بعد وزیر اعظم مودی کا پہلا امریکی دورہ تھا۔ آئی اے این ایس نے ذرائع کے حوالے سے بتایا کہ نائب قومی سلامتی کے مشیر (این ایس اے) پون کپور بھی خارجہ سکریٹری وکرم مسری کے ساتھ امریکہ کے دورہ پر جا سکتے ہیں۔

قابل غور ہے کہ یہ دورہ ایسے وقت میں ہو رہا ہے جب امریکی صدر ڈونالڈ ٹرمپ کی طرف سے حال ہی میں یہ دعویٰ کیا گیا تھا کہ ان کی انتظامیہ نے ہندوستان اور پاکستان کے درمیان جنگ بندی میں ثالث کا کردار ادا کیا تھا۔