کرناٹک کے کلبرگی میں کھڑے ٹرک سے وین کی ٹکر، 5 کی موت، 10 شدید زخمی

کرناٹک کے کلبرگی ضلع میں ایک بڑا سڑک حادثہ ہوا ہے۔ یہاں سڑک کنارے کھڑے ایک ٹرک سے ایک تیز رفتار وین شدید طور پر جا ٹکرائی جس میں 5 لوگوں کی موت ہو گئی اور 10 دیگر زخمی ہو گئے۔ حادثے کے بعد موقع پر کہرام مچ گیا اور لوگوں کی چیخ و پکار شروع ہو گئی۔

کلبرگی پولیس کے مطابق سبھی مہلوکین باگل کوٹ ضلع کے رہنے والے تھے۔ زخمیوں کا کلبرگی کے اسپتال میں علاج چل رہا ہے۔ اس درمیان ضلع کے ایس پی اے شرینواسلو نے جائے وقوع کا دورہ کیا۔ نیلوگی تھانہ میں معاملہ درج کرکے حادثہ کی جانچ شروع کر دی گئی ہے۔

مہلوکین میں ایک 13 سالہ بچہ بھی شامل ہے۔ پولیس کے مطابق سبھی لوگ کلبرگی ضلع میں واقع درگاہ جا رہے تھے۔ پولیس نے بتایا کہ ٹرک کا ٹائر پنکچر ہو گیا تھا۔ وہ سڑک کی بائیں طرف کھڑا تھا۔ ڈرائیور ٹائر بدلنے میں مصروف تھا۔ تبھی مسافروں کو درگاہ لے جا رہی وین نے پیچھے سے ٹرک کو زوردار ٹکر مار دی۔

کلبرگی ایس پی اے شرینواسلو نے بتایا کہ حادثہ اتنا شدید تھا کہ 5 لوگوں کی موت موقع پر ہی ہوگئی۔ زخمیوں کو فوراً کلبرگی کے اسپتال میں داخل کرایا گیا جہاں ان کا علاج جاری ہے۔ کئی زخمیوں کی حالت سنگین بتائی جا رہی ہے اور ان کی شناخت کی بھی کوشش جا ری ہے۔ بتایا جاتا ہے کہ حادثے کے بعد گاڑی کا ڈرائیور موقع سے فرار ہو گیا۔

پولیس کے مطابق حادثے کی وجوہات کا پتہ لگانے کے لیے سبھی پہلوؤں کی جانچ کی جا رہی ہے۔ ایس پی نے جائے حادثہ کا دورہ کیا اور راحت کاموں کا جائزہ لیا۔ انہوں نے کہا کہ پولیس نے نیلوگی تھانہ میں معاملہ درج کیا ہے۔ آگے کی کارروائی کے لیے ٹیم تشکیل دے دی گئی ہے۔