کپواڑہ میں ای میل کے ذریعہ کی جانے والی شکایات پر پہلی ای ایف آئی آر درج

ڈیجیٹل پولیسنگ کی طرف ایک قدم میں پولیس نے شمالی کشمیر کے ضلع کپواڑہ میں ای میل کے ذریعہ موصول ہونے والی شکایت پر پہلی ای ایف آئی آر درج کی ہے۔

ایک پولیس ترجمان نے بتایا کہ 5 مارچ 2025 کو غلام نبی بٹ ولد حاجی اسد اللہ بٹ ساکن باغات کالونی بوہامہ کپواڑہ کی طرف سے ای میل کے ذریعہ ایک شکایت موصول ہوئی جس میں بتایا گیا کہ جب وہ گھر پر نہیں تھے، ایک شخص (نام مخفی) نے مبینہ طور پر اس کے لکڑی کے شیڈ اور گائے کے شیڈ کو آگ لگا دی۔ انہوں نے کہا کہ 'خوش قسمتی سے آگ مزید پھیلنے سے پہلے ہی بجھا دی گئی اور شکایت کنندہ نے الزام لگایا کہ یہ جان بوجھ کر اس کی املاک کو نقصان پہنچانے کی کوشش تھی'۔

بیان میں کہا گیا ' شکایت موصول ہونے پر معاملے کی ابتدائی طور پر تصدیق کی گئی اور اسے درست پایا گیا اور 6 مارچ 2025 کو شکایت کنندہ نے سرکاری کاپی پر دستخط کیے اور اس کے مطابق قانون کے متعلقہ سیکشنز کے تحت ایف آئی آر نمبر 60/2025 درج کی گئی'۔

انہوں نے کہا کہ حقائق جاننے اور ضروری قانونی کارروائی کے لیے تحقیقات کا آغاز کر دیا گیا ہے۔بیان کے مطابق یہ ای ایف آئی آر ڈیجیٹل پولیسنگ میں ایک اہم قدم کی نشاندہی کرتا ہے جس سے شکایت کے اندراج کے عمل کو زیادہ موثر اور شہریوں کے لیے قابل رسائی بنایا گیا ہے۔