راجہ بھیا کے خلاف دہلی میں ایف آئی آر درج، اہلیہ نے لگایا تشدد کا الزام

اتر پردیش کے رہنما رگھو راج پرتاپ سنگھ عرف راجہ بھیا کے خلاف دہلی کے صفدر جنگ انکلیو تھانے میں ایف آئی آر درج کی گئی ہے۔ ان کے خلاف ان کی اہلیہ بھانوی کماری سنگھ نے تشدد کرنے کا الزام لگایا تھا۔ بھانوی سنگھ گزشتہ کافی وقت سے اپنے شوہر سے الگ دہلی میں رہ رہی ہیں۔

بھانوی کماری سنگھ کی طرف سے دہلی پولیس کو دی گئی تحریری شکایت میں اپنے شوہر رگھو راج پرتاپ سنگھ کے خلاف جسمانی اور ذہنی طور پر استحصال کرنے کا الزام لگایا گیا ہے۔ اس کے ساتھ ہی انہوں نے پولیس سے تحفظ کی گہار لگائی ہے۔ پولیس نے شکایت کی بنیاد پر آئی پی سی کی دفعہ 498 اے کے تحت یہ ایف آئی آر درج کر لی ہے۔ اس معاملے میں فی الحال آگے کی جانچ جاری ہے۔

دہلی پولیس کا کہنا ہے کہ یہ معاملہ پہلے کرائم اگینسٹ ویمن سیل میں چل رہا تھا اور میڈیشن سینٹر بھی گیا تھا۔ اس کے بعد جب یہ معاملہ تھانے آیا تو مقدمہ درج کیا گیا ہے۔ ایف آئی آر کے مطابق بھانوی سنگھ نے اپنی شکایت میں کہا ہے کہ میرے شوہر رگھوراج پرتاپ سنگھ گزشتہ کئی برسوں سے میرے خلاف جسمانی اور ذہنی طور پر ظلم کر رہے ہیں اور حالیہ میڈیکل رپورٹ سے یہ ثابت ہوتا ہے کہ میرے شوہر کے ذریعہ کیے گئے جسمانی تشدد کی وجہ سے میرے اعضا کو نقصان پہنچا ہے، جس سے میری جان کو بھی خطرہ ہے۔

شکایت میں یہ بھی کہا گیا ہے کہ دہلی اور یوپی میں دونوں فریقوں کے درمیان کئی معاملے زیر التوا ہیں۔ حالانکہ حالیہ رپورٹوں اور دوسرے فریق کے ذریعہ مجھے ملی موت کی دھمکیوں نے اپنی زندگی کے تحفظ کے لیے حالیہ شکایت درج کرانے کے لیے مجبور کیا ہے۔ حال ہی میں دی گئی موت کی دھمکیوں کی تفصیل بھی درج شکایت کا حصہ ہے۔