ہریانہ کے انبالہ میں فائٹر جیٹ حادثہ کا شکار، زخمی پائلٹ اسپتال میں داخل، تحقیقات کا حکم جاری

ہریانہ کے انبالہ ضلع میں جمعہ کے روز فضائیہ کا ایک جنگی طیارہ جگوار حادثہ کا شکار ہو گیا۔ اچھی بات یہ رہی کہ پائلٹ نے خود کو وقت رہتے جنگی طیارہ سے خود کو باہر نکال لیا۔ زخمی پائلٹ کو فوجی ہیلی کاپٹر سے قریبی اسپتال میں علاج کے لیے داخل کرایا گیا ہے۔

میڈیا رپورٹس کے مطابق فائٹر جیٹ حادثہ کا شکار ضرور ہوا ہے، لیکن اس سے کوئی جانی نقصان نہیں ہوا۔ جس مقام پر جنگی طیارہ گرا، وہاں پر بھی کسی نقصان کی خبر نہیں ہے۔ حالانکہ حادثہ کی وجہ سے آس پاس کے علاقوں میں افرا تفری کا ماحول ضرور پیدا ہو گیا۔ اس حادثہ میں پائلٹ کے علاوہ کسی دیگر شخص کے زخمی ہونے کی بھی اطلاع نہیں ہے۔

فضائیہ نے سوشل میڈیا پلیٹ فارم ’ایکس‘ پر اس حادثہ کے تعلق سے جانکاری دیتے ہوئے ایک پوسٹ کیا ہے۔ اس میں لکھا ہے کہ ’’آج مستقل تربیتی پرواز کے دوران انبالہ میں ہندوستانی فضائیہ کا ایک جگوار طیارہ سسٹم میں خرابی کے سبب حادثہ کا شکار ہو گیا۔ بہ حفاظت خود کو اجیکٹ کرنے سے پہلے پائلٹ طیارہ کو آبادی سے دور لے گیا۔ حادثہ کے اسباب کا پتہ لگانے کے لیے ہندوستانی فضائیہ نے تحقیقات کا حکم دے دیا ہے۔‘‘

اس حادثہ کے بعد کی کچھ تصویریں سامنے آئی ہیں، جس میں دیکھا جا سکتا ہے کہ طیارہ کا کافی حصہ جل کر خاک ہو چکا ہے۔ حادثہ کے فوراً بعد زخمی پائلٹ نے اپنے افسران کو اس کی اطلاع دی، جس کے بعد فوری کارروائی شروع کی گئی۔ فوجی ہیلی کاپٹر کی مدد سے زخمی پائلٹ کو فوراً علاج کے لیے قریبی اسپتال لے جایا گیا۔ حادثہ کی خبر ملتے ہی مقامی پولیس ٹیم نے بھی موقع پر پہنچ کر جائے وقوع کو گھیر لیا۔ پولیس کا کہنا ہے کہ فوج کی ریسکیو ٹیم بھی موقع پر پہنچ گئی اور تحقیقات شروع ہو گئی ہے۔