خوفناک سڑک حادثہ: یمنا ایکسپریس وے پر ٹرک سے ٹکرائی بس، 2 ہلاک، 10 زخمی

اتر پردیش کے آگرہ ضلع سے گزرنے والے یمنا ایکسپریس وے کے کھنڈولی ٹول پلازہ کے قریب پیر کی صبح تقریباً 4 بجے ایک ڈبل ڈیکر بس لوہے کی سلاخوں سے لدے ٹریلر سے ٹکرا گئی۔ حادثے میں 2 افراد جاں بحق اور 10 زخمی ہوگئے۔ پولیس کے مطابق بس ڈرائیور ایکسپریس وے کے کنارے کھڑے ٹریلر کو نہ دیکھ سکا اور اسے پیچھے سے ٹکر مار دی۔

مرنے والوں کی شناخت گوالیار کی ایک ٹریول کمپنی کی ایک پرائیویٹ ڈبل ڈیکر بس کے ڈرائیور کے طور پر کی گئی ہے۔ بس دہلی سے گوالیار جا رہی تھی۔ کھنڈولی پولیس اسٹیشن کے انچارج امت کمار نے بتایا کہ بس میں 40 مسافر سوار تھے۔ ان میں سے 10 زخمی ہیں، جبکہ چار کی حالت تشویشناک بتائی جا رہی ہے۔ زخمی مریضوں کو ایس این میڈیکل کالج میں داخل کرایا گیا ہے۔

ہلاک ہونے والے ڈرائیوروں میں سے ایک کی شناخت 40 سالہ نریندر شرما کے طور پر کی گئی ہے، جو حادثے کے وقت بس چلا رہا تھا۔ دوسرا ڈرائیور، جس کی موت پچھلی سیٹ پر سوتے ہوئے ہوئی، اس کی شناخت 45 سالہ راکیش شرما کے طور پر ہوئی ہے۔ اہلکار نے بتایا کہ 10 زخمیوں میں سے دو کو علاج کے بعد فارغ کر دیا گیا، جبکہ آٹھ دیگر زیر علاج ہیں۔ حادثہ میں زخمی دہلی، بہار، مدھیہ پردیش اور راجستھان کے رہنے والے ہیں۔