کسان تحریک کے لیے اب تک تقریباً 5 کروڑ روپے کا چندہ حاصل!

دہلی بارڈس پر جاری کسان تحریک کو اب تک 5 کروڑ روپے چندہ ملنے کی بات سامنے آئی ہے۔ سنیوکت کسان مورچہ نے اس سلسلے میں کنڈلی بارڈر پر لوگوں کے سامنے پورا حساب رکھ دیا۔ دراصل چندہ کو لے کر کئی طرح کے سوال اٹھ رہے تھے جس کے پیش نظر سنیوکت کسان مورچہ نے تفصیل پیش کرتے ہوئے جانکاری دی کہ تحریک کے دوران اب تک 4694 لوگوں نے تقریباً 5 کروڑ روپے کا چندہ دیا ہے۔ اس میں سے سب سے زیادہ تقریباً 60 لاکھ روپے بیمار لوگوں کے علاج پر خرچ ہوئے ہیں۔ کسان مورچہ کے مطابق پہلے کے مقابلے اب روزانہ ملنے والا عطیہ نصف ہو گیا ہے۔ پہلے جہاں روزانہ تقریباً 5 لاکھ روپے کا چندہ مل رہا تھا، اب یہ رقم گھٹ کر ڈھائی لاکھ تک ہی رہ گئی ہے۔

کسان لیڈر راکیش ٹکیت نے بغیر قانون واپسی کے گھر واپسی سے ایک بار پھر انکار کر دیا ہے۔ انھوں نے میڈیا سے کہا کہ ’’ہمیں ترمیم نہیں چاہیے، قانون ختم ہونا چاہیے۔ بغیر پوچھے آپ نے قانون بنا دیا اور پھر پوچھتے ہیں کہ اس میں کمی کیا ہے؟ اناج کو تجوری میں بند کرنا چاہتے ہیں، بھوک پر کاروبار کرنا چاہتے ہیں، ایسا نہیں ہوگا۔‘‘

بھارتیہ کسان یونین کے ترجمان راکیش ٹکیت نے اتراکھنڈ کے اودھم سنگھ نگر جاتے وقت اتوار کی شب بجنور کے افضل گڑھ میں صحافیوں سے کہا کہ ’’20-15 دنوں سے مرکزی حکومت کی خاموشی سے اشارہ مل رہا ہے کہ کچھ ہونے والا ہے۔ حکومت کسان تحریک کے خلاف کچھ قدم اٹھانے کا خاکہ بنا رہی ہے۔‘‘

دودھ کو پانچ دن تک نہیں فروخت کرنے اور اس کے بعد 100 روپے کلو فروخت کیے جانے کے فیصلے کو آج سنیوکت کسان مورچہ نے افواہ قرار دے دیا ہے۔ سنیوکت کسان مورچہ کا کہنا ہے کہ سوشل میڈیا پر ایسی خبریں وائرل کی جا رہی ہیں، لیکن یہ خبر افواہ سے زیادہ کچھ نہیں ہے۔ مورچہ نے کسانوں سے یہ اپیل بھی کی کہ جس طرح سے پہلے دودھ فروخت کی جا رہی تھی، اسی طرح بیچنا جاری رکھا جائے۔ واضح رہے کہ ایسی خبریں سامنے آئی تھیں کہ مودی حکومت پر دباؤ بنانے کے لیے کسان منصوبہ بندی کے تحت دودھ کی قیمتوں میں اضافہ کریں گے۔