بہار اسمبلی انتخابات: الیکشن کمیشن کی مثالی ضابطہ اخلاق پر سختی سے عمل کرنے کی ہدایت

نئی دہلی: الیکشن کمیشن نے بہار اسمبلی انتخابات کے دوران مثالی ضابطہ اخلاق (ماڈل کوڈ آف کنڈکٹ، ایم سی سی) پر سختی سے عمل آوری کے احکامات جاری کیے ہیں۔ کمیشن نے ریاست کے چیف سکریٹری اور چیف الیکٹورل آفیسر کو ہدایت دی ہے کہ وہ ضابطہ اخلاق کے ہر پہلو پر سخت نگرانی رکھیں تاکہ انتخابی عمل آزاد، منصفانہ اور شفاف انداز میں مکمل ہو۔

کمیشن نے 6 اکتوبر کو 243 رکنی بہار اسمبلی کے انتخابات کا شیڈول جاری کرتے ہوئے بتایا تھا کہ ضابطہ اخلاق اسی دن سے نافذ العمل ہو گیا ہے۔ بہار کے ساتھ ملک کی سات دیگر ریاستوں کی آٹھ نشستوں پر ضمنی انتخابات بھی ہونے ہیں، جن پر یہی اصول لاگو ہوں گے۔

کمیشن نے بدھ کے روز جاری اپنی پریس ریلیز میں واضح کیا کہ بہار سے متعلق کسی بھی سرکاری اعلان، نئی اسکیم یا پالیسی فیصلے پر اب مرکز کی حکومت پر بھی ضابطہ اخلاق لاگو ہوگا۔ کسی وزیر یا سرکاری اہلکار کو اپنے عہدے یا سرکاری وسائل کا استعمال انتخابی مہم کے لیے کرنے کی اجازت نہیں ہوگی۔

الیکشن کمیشن نے تمام سرکاری، عوامی اور نجی املاک سے انتخابی بینر، پوسٹر، ہورڈنگ اور جھنڈے فوری طور پر ہٹانے کے احکامات دیے ہیں۔ کوئی بھی سیاسی جماعت یا امیدوار سرکاری گاڑیوں، دفاتر یا رہائش گاہوں کو انتخابی تشہیر کے لیے استعمال نہیں کر سکے گا۔

کمیشن نے شہریوں کی رازداری کے تحفظ پر بھی زور دیا ہے۔ کسی امیدوار یا پارٹی کو کسی شخص کے گھر یا نجی احاطے کے باہر احتجاج یا دھرنا دینے کی اجازت نہیں ہوگی۔ نجی املاک پر جھنڈا یا بینر لگانے کے لیے مالک کی تحریری اجازت لازمی قرار دی گئی ہے۔

ضابطہ اخلاق کی خلاف ورزی کی شکایات درج کرانے کے لیے کمیشن نے 1950 نمبر پر ایک چوبیس گھنٹے فعال کال سینٹر قائم کیا ہے۔ شہری سی-وِجل‘ ایپ کے ذریعے بھی شکایات درج کرا سکتے ہیں، جن پر 100 منٹ کے اندر کارروائی کی جاتی ہے۔ ریاست بھر میں اس مقصد کے لیے 824 فلائنگ اسکواڈ تعینات کیے گئے ہیں۔

الیکشن کمیشن نے سیاسی جماعتوں کو ہدایت دی ہے کہ وہ اپنی ریلیوں اور عوامی جلسوں کی پیشگی اطلاع انتظامیہ کو دیں تاکہ سکیورٹی اور ٹریفک انتظامات مناسب رہیں۔ کسی بھی عوامی تقریب کے لیے لاؤڈ اسپیکر یا دیگر وسائل کے استعمال کی اجازت پہلے سے لینا ضروری ہوگا۔

اس کے علاوہ، کمیشن نے تمام سیاسی جماعتوں کے لیے ’سُویدھا’ نامی ایک آن لائن ماڈیول متعارف کرایا ہے، جس کے ذریعے گراؤنڈز، ہیلی پیڈ اور عوامی مقامات کے استعمال کی درخواستیں جمع کرائی جا سکتی ہیں۔ یہ سہولت تمام جماعتوں کے لیے یکساں شرائط پر دستیاب ہوگی۔

کمیشن نے افسران کے تبادلوں پر بھی روک لگاتے ہوئے ہدایت دی ہے کہ تمام عہدیداران اپنی ذمہ داریاں غیر جانبداری کے ساتھ انجام دیں اور کسی بھی جماعت کی طرف جھکاؤ نہ دکھائیں۔

بہار اسمبلی انتخابات دو مرحلوں میں ہوں گے — پہلا مرحلہ 6 نومبر اور دوسرا مرحلہ 11 نومبر کو، جبکہ ووٹوں کی گنتی 14 نومبر کو کی جائے گی۔ الیکشن کمیشن نے کہا ہے کہ اس بار ضابطہ اخلاق کی خلاف ورزیوں پر فوری اور سخت کارروائی عمل میں لائی جائے گی تاکہ انتخابی شفافیت پر کوئی سوال نہ اٹھے۔