’الیکشن کمیشن مر گیا‘، تیجسوی نے 4 دن بعد بھی ووٹنگ کے اعداد و شمار جاری نہ ہونے پر ناراضگی کا کیا اظہار

بہار اسمبلی انتخاب کے دوسرے مرحلہ کی ووٹنگ کل یعنی 11 نومبر کو ہونے والی ہے۔ اس سے عین قبل آر جے ڈی لیڈر اور مہاگٹھ بندھن کے مشترکہ وزیر اعلیٰ امیدوار تیجسوی یادو نے الیکشن کمیشن اور بی جے پی کو ہدف تنقید بنایا ہے۔ انھوں نے ایک پریس کانفرنس میں کہا کہ ’’میں نے سب سے زیادہ 171 انتخابی جلسے کیے ہیں۔ کوئی ایسا ضلع، بلاک نہیں بچا جہاں ہم نہیں گئے۔ اب 20 سال پرانی حکومت بدلنا ہے، 20 سال حکومت کرنے کے بعد بھی این ڈی اے حکومت نے بہار کو سب سے پیچھے کیا۔ این ڈی اے نے 20 سال میں بہار کو آخری پائیدان تک پہنچا دیا ہے۔‘‘

بی جے پی لیڈر اور مرکزی وزیر داخلہ امت شاہ کا ذکر کرتے ہوئے تیجسوی نے کہا کہ وزیر داخلہ کو کوئی کام نہیں ہے۔ وہ اس وقت پٹنہ میں ڈیرا ڈالے ہوئے ہیں۔ انھوں نے کئی بڑے بڑے افسران کو بلایا ہے اور بڑی گڑبڑی کی ہدایت دی گئی ہے۔ آر جے ڈی لیڈر نے کہا کہ ’’ان کی بوکھلاہٹ بتا رہی ہے کہ یہ لوگ اب جانے والے ہیں۔‘‘ وہ مزید کہتے ہیں کہ ’’ہمارے لوگوں کی بھی گہری نظر سبھی پر بنی ہوئی ہے۔‘‘

تیجسوی یادو نے میڈیا سے مخاطب ہوتے ہوئے کہا کہ افسران کی میٹنگ اور ان کو دی جا رہی ہدایات سے متعلق جانکاری ہمیں انہی افسران سے ملی ہے جنھیں یہ ہدایات دی گئی ہیں۔ تیجسوی نے الیکشن کمیشن پر سخت حملہ کرتے ہوئے کہا کہ ’’4 دن بعد بھی الیکشن کمیشن نے پہلے مرحلہ میں کتنی خواتین اور مردوں نے ووٹنگ کی، اس سے متعلق اعداد و شماری جاری نہیں کیے گئے ہیں۔ یہ کیوں چھپایا جا رہا ہے؟ الیکشن کمیشن مر چکا ہے۔‘‘ وہ مزید کہتے ہیں کہ ’’الیکشن کمیشن سے کچھ معاملوں میں وضاحت کی ضرورت ہے۔ سمستی پور میں پرچیاں ملی تھیں۔ یہی وجہ ہے کہ لوگ ڈرے ہوئے ہیں، گھبرائے ہوئے ہیں۔‘‘