بہار اسمبلی انتخابات کی تیاریوں کا جائزہ شروع، پٹنہ پہنچا الیکشن کمیشن کا وفد

بہار میں کسی بھی وقت اسمبلی انتخابات کی تاریخ کا اعلان کیا جا سکتا ہے۔ اس سے قبل ہندوستانی الیکشن کمیشن (ای سی آئی) نے انتخابی تیاریوں میں تیزی لاتے ہوئے ریاستی سطح پر سرگرمیاں بڑھا دی ہیں۔ جمعہ کے روز چیف الیکشن کمشنر (سی ای سی) گیانیش کمار اور الیکشن کمشنرز ڈاکٹر سکھبیر سنگھ سندھو اور ڈاکٹر وویک جوشی کی قیادت میں ای سی آئی کا اعلیٰ سطحی وفد پٹنہ پہنچا، جہاں اس نے انتخابی تیاریوں کا تفصیلی جائزہ لینا شروع کیا۔

الیکشن کمیشن نے سوشل میڈیا پلیٹ فارم ’ایکس‘ پر جاری بیان میں بتایا کہ وفد بہار اسمبلی انتخابات کی تیاریوں کا جائزہ لینے کے مقصد سے دورے پر ہے۔ اس موقع پر کمیشن نے کہا کہ آزادانہ اور منصفانہ انتخابات کے انعقاد کے لیے تمام انتظامات پر سختی سے عمل درآمد کرایا جائے گا۔

اس سے قبل کمیشن نے بہار اسمبلی کے عام انتخابات اور چند ریاستوں کے ضمنی انتخابات میں تعینات کیے جانے والے مرکزی مبصرین کے لیے نئی دہلی میں ایک خصوصی بریفنگ کا اہتمام کیا تھا۔ اس اجلاس میں 287 آئی اے ایس، 58 آئی پی ایس اور آئی آر ایس، آئی آر اے ایس، آئی سی اے ایس سمیت مختلف خدمات کے 80 افسران شریک ہوئے۔ مجموعی طور پر 425 افسران نے بریفنگ میں شرکت کی۔ یہ اجلاس انڈین انسٹی ٹیوٹ آف الیکٹورل مینجمنٹ (آئی آئی ڈی ای ایم) نئی دہلی میں منعقد ہوا۔

چیف الیکشن کمشنر گیانیش کمار نے دونوں الیکشن کمشنرز کے ساتھ مل کر مبصرین کو ہدایت دی کہ وہ انتخابی عمل کے دوران کمیشن کی ’آنکھ اور کان‘ کی حیثیت سے کام کریں۔ انہوں نے مبصرین کو جمہوریت کا ’روشنی کا مینار‘ قرار دیتے ہوئے کہا کہ ان کی بنیادی ذمہ داری یہ ہے کہ وہ انتخابی قوانین، ضوابط اور رہنما خطوط پر سختی سے عمل درآمد یقینی بنائیں اور زمینی حقائق پر مبنی بروقت رپورٹ فراہم کریں۔

مبصرین کو واضح ہدایت دی گئی ہے کہ وہ سیاسی جماعتوں، امیدواروں اور عام ووٹروں کی شکایات سننے اور ان کا بروقت ازالہ کرنے کے لیے ہر وقت دستیاب رہیں۔ انہیں ہدایت دی گئی ہے کہ وہ پولنگ مراکز کا معائنہ کریں اور ان سہولیات کو یقینی بنائیں جو کمیشن نے حالیہ دنوں میں ووٹروں کی آسانی کے لیے نافذ کی ہیں۔

الیکشن کمیشن نے کہا کہ آئین کے آرٹیکل 324 اور نمائندگی قانون 1951 کی دفعہ 20بی کے تحت مرکزی مبصرین کی تقرری کی جاتی ہے تاکہ وہ کمیشن کی معاونت کرتے ہوئے انتخابی عمل کو شفاف اور غیرجانبدار بنانے میں کلیدی کردار ادا کریں۔ یہ مبصرین نہ صرف ضابطوں کی نگرانی کرتے ہیں بلکہ علاقائی سطح پر انتخابی انتظامات کی کارکردگی کو بھی پرکھتے ہیں۔

الیکشن کمیشن کے مطابق، بہار میں ہونے والے اسمبلی انتخابات کو پرامن اور شفاف بنانے کے لیے ضلعی انتظامیہ، پولیس اور دیگر اداروں کے ساتھ تال میل مضبوط بنایا گیا ہے۔ پٹنہ پہنچنے والے وفد کی جانب سے مقامی حکام کے ساتھ اعلیٰ سطحی میٹنگز کا سلسلہ شروع ہو چکا ہے، جس میں سکیورٹی، ریزرو فورسز کی تعیناتی، ووٹروں کی سہولیات اور ماڈل کوڈ آف کنڈکٹ کے نفاذ جیسے امور پر غور کیا جا رہا ہے۔