ہندوستان سمیت تین ملکوں میں زلزلہ کے جھٹکے، ایران میں 5.6 شدت کے زلزلے سے لوگوں میں دہشت

زلزلہ کے جھٹکوں سے ایک بار پھر زمین کانپ اُٹھی ہے۔ آج صبح ہندوستان، تاجکستان اور ایران میں زلزلہ کے جھٹکے محسوس کیے گئے۔ دیر رات 12 بجے کے بعد سے صبح 5 بجے تک تینوں ملکوں میں زلزلہ کے جھٹکوں سے لوگوں میں دہشت پیدا ہو گئی۔ حالانکہ ان ملکوں میں زلزلہ سے کسی بھی طرح کے جانی و مالی نقصان کی ابھی تک کوئی خبر نہیں ہے۔

سب سے پہلے زلزلہ ہندوستان کی آسام ریاست کے ناگاؤں ضلع میں آیا۔ دیر رات قریب 12 بجکر 56  منٹ پر زلزلہ کے جھٹکوں سے زمین ہلی۔ زلزلے کی شدت ریختر پیمانے پر 2.9 درج کی گئی۔ زلزلے کا مرکز زمین کے نیچے 40 کلومیٹر کی گہرائی میں تھا۔ 8 جولائی کو بھی کاربی آنلونگ ضلع میں زلزلہ کے جھٹکے لگے تھے، جس کی شدت 4.1 تھی۔

ہندوستان کے بعد تاجکستان میں زلزلہ کے جھٹکے محسوس کیے گئے۔ یہاں زلزلے کی شدت ریختر پیمانے پر 4 درج کی گئی۔ اس کا مرکز زمین کے نیچے 160 کلومیٹر کی گہرائی میں ملا۔ تاجکستان میں زلزلہ دیر رات قریب 1 بجے آیا۔ اس کے بعد صبح سویرے ایران میں زلزلہ آیا جس کی شدت ریختر اسکیل پر 5.6 درج کی گئی۔ زلزلے کا مرکز ایران کی راجدھانی تہران کے پاس ملا۔ زلزلہ کے تیز جھٹکوں سے یہاں کے لوگوں میں دہشت کا ماحول ہے۔

اے این آئی کی رپورٹ کے مطابق تاجکستان میں جولائی مہینے میں آج چوتھی بار زلزلہ آیا ہے۔ اس سے پہلے 18 جولائی کو بھی زلزلے کے جھٹکے لگے تھے، جس کی شدت 3.8 تھی۔ اس کے بعد 12 جولائی کو دو مرتبہ زلزلہ آیا تھا۔ پہلے زلزلے کی شدت 4.8 تھی جس کا مرکز زمین کے نیچے 60 کلومیٹر کی گہرائی میں ملا۔ وہیں دوسرے زلزلے کی شدت 4.2 تھی اور اس کا مرکز زمین کے نیچے 107 کلومیٹر کی گہرائی میں تھا۔ اس سے پہلے 21 جون کو بھی 4 کی شدت والا زلزلہ آیا تھا۔

واضح رہے کہ تاجکستان ایک پہاڑی ملک ہے اور زلزلہ، سیلاب، خشک سالی، لینڈ سلائڈ کے پیش نظر کافی حساس ملک ہے۔ اس ملک میں گلیشیئر سے نکلنے والی ندیاں آبپاشی کا ذریعہ ہیں۔ زلزلہ آنے سے اکثر گلیشیئر ہلتے ہیں، جس سے برفانی تودہ گرنے کے ساتھ ندیاں زیر آب ہو جاتی ہیں۔