دبئی کے ولی عہد شیخ حمدان کا ہندوستان دورہ آج سے، ہند-یو اے ای تعلقات مضبوط کرنے پر زور

دبئی کے ولی عہد شیخ حمدان بن محمد المکتوم دو روزہ دورے پر آج ہندوستان پہنچیں گے۔ اپنے دورہ کے دوران وہ وزیر خارجہ ایس جئے شنکر، وزیر دفاع راج ناتھ سنگھ کے ساتھ میٹنگ کریں گے اور ہندوستان اور متحدہ عرب امارات کے تعلقات کو مضبوط کرنے کے لیے ایک تجارتی گولمیز میٹنگ میں حصہ لیں گے۔ یہ اطلاع وزارت خارجہ نے پیر کو دی۔

وزارت خارجہ نے ایک بیان میں کہا کہ شیخ حمدان کا دورہ وزیر اعظم نریندر مودی کی دعوت پر ہو رہا ہے جو آج (8 اپریل) ولی عہد کے لیے ورکنگ لنچ کا انعقاد کریں گے۔ دبئی کے ولی عہد کے طور پر شیخ حمدان کا یہ پہلا ہندوستانی دورہ ہے۔

وزارت خارجہ نے بتایا کہ شیخ ہمدان کے ساتھ کئی وزیر، سینئر سرکاری افسر اور اعلیٰ سطحی تجارتی وفد بھی شامل ہوگا۔ بیان میں کہا گیا، ’’ولی عہد کا دورہ ہندوستان-یو اے ای تجارتی اسٹریٹیجی ساجھیداری (سی ایس پی) کو اور مضبوط کرے گا۔ شیخ ہمدان اپنے دورہ کے دوران وزیر خارجہ ایس جئے شنکر اور وزیر دفاع راج ناتھ سنگھ  کے ساتھ میٹنگ کریں گے۔‘‘

اپنے دورہ کے دوران شیخ ہمدان ممبئی میں دونوں فریقوں کے اہم تجارتی رہنماؤں کے ساتھ تجارتی گولمیز میٹنگ میں حصہ لیں گے۔ اس بات چیت سے مستقبل کے لیے ہند-یو اے آئی اقتصادی اور تجارتی تعاون مضبوط ہوگا۔

روایتی طور پر دبئی نے ہندوستان کے تجارتی، ثقافتی اور متحدہ عرب امارات کے ساتھ لوگوں کے درمیان تبادلے میں اہم کردار ادا کیا ہے۔ بیان میں کہا گیا کہ یو اے ای میں تقریباً 40 لاکھ 30 ہزار ہندوستانی تارکین وطن میں سے زیادہ تر دبئی میں رہتے ہیں اور کام کرتے ہیں۔