شایان اودھ کی آخری شمع بھی گل

کولکاتہ: اودھ کے آخری تاجدار نواب واجد علی شاہ اوربیگم حضرت محل کے آخری پڑپوتے ڈاکٹر کوکب قدر سجاد علی مرزا کا آج شام 4.30 بجے کولکاتہ کے پیریس اسپتال میں انتقال ہوگیا۔ وہ 87 برس کے تھے۔ تقریباً ایک ہفتہ قبل ان کا کورونا ٹسٹ ہوا تھا جس میں وہ پازیٹو پائے گئے تھے۔ ان کے پسماندگان میں بیوہ، 2 بیٹے اور 4 بیٹیاں ہیں۔ مرحوم کوکب قدر سجاد سبطین آباد ٹرسٹ مٹیا برج کولکاتہ کے سینئر ٹرسٹی تھے، جہاں ان کے پردادا نواب واجد علی شاہ مدفون ہیں۔

کوکب قدر سجاد علی مرزا نے علی گڑھ مسلم یونیورسٹی کے شعبہ اردو میں نواب واجد علی شاہ کے ثقافتی اور ادبی خدمات پر پی ایچ ڈی کی اور وہیں سروس جوائن کرلی، جہاں سے اردو کے پروفیسر کے بطور 1993 میں ریٹائر ہوئے۔ ڈاکٹر کوکب قدر بلیرڈ اور اسنوکر کے میدان کے بھی مشہور ومعروف کھلاڑی تھے۔ وہ بلیرڈ اور اسنوکرآف انڈیا کے فاؤنڈر سکریٹری تھے۔ پہلی عالمی اسنوکر چمپئن شپ کے وہ چیف ریفری بھی بنے۔

کوکب قدر سجاد علی مرزا نے اپنی بیٹی منزلت فاطمہ کو 1980 میں جونیئر نیشنل اسنوکر چمپئن شپ میں داخل کرایا جو نیشنل اسنوکر چمپئن شپ میں داخل ہونے والی پہلی کھلاڑی بنیں۔ انھوں نے کئی اہم تصانیف بھی قلم بند کیں جن میں واجد علی شاہ پر ان کے تحقیقی مقالہ اور اقلیم سخن کے تاجدار کی ادبی حلقوں میں کافی پذیرائی ہوئی۔