جھارکھنڈ: زوردار بارش سے اب تک 4 ہلاکتیں، رانچی ایئرپورٹ کا نظام ٹھپ

جھارکھنڈ کے نصف درجن اضلاع میں 30 سے لے کر 48 گھنٹوں سے ہو رہی لگاتار زوردار بارش کے سبب جگہ جگہ تباہی اور آفت کا عالم ہے۔ بارش کے دوران الگ الگ حادثوں میں اب تک چار لوگوں کی موت ہو گئی ہے۔ جمشید پور، رانچی، مغربی سنگھ بھوم، رام گڑھ اور ہزاری باغ میں کم از کم 150 سے زائد درخت جڑ سے اکھڑ گئے ہیں۔

زوردار بارش کی وجہ سے رانچی واقع برسا منڈا ایئرپورٹ سے طیاروں کی پرواز بھی بری طرح متاثر ہوئی ہے۔ ہفتہ کے روز محض ایک فلائٹ کی لینڈنگ ہو پائی۔ انڈیگو نے رانچی ایئرپورٹ سے ہفتہ کی اپنی سبھی آٹھ پروازوں کو رد کر دیا ہے۔ ان میں ممبئی، احمد آباد، پٹنہ، دہلی، چنئی، کولکاتا، بنگلورو اور پونے کی فلائٹس شامل ہیں۔ بارش کا سب سے زیادہ منفی اثر بجلی فراہمی پر پڑا ہے۔ رانچی اور جمشید پور میں 30 سے بھی زائد مقامات پر 11 ہزار وولٹ کے بجلی تار ٹوٹ گئے ہیں۔ ان دونوں شہروں کے کئی علاقوں میں 20-18 گھنٹے سے بجلی فراہمی ٹھپ ہے۔

رام گڑھ ضلع کے پتراتو میں نلکاری پل پر پانی کے تیز بہاؤ میں نصف درجن لوگوں کے بہہ جانے کی خبر ہے۔ ان میں سے دو لوگوں کی لاشیں برآمد کی گئی ہیں۔ ایک کار اور دو بائیک بھی بہہ گئیں۔ یہاں پولیس انتظامیہ راحت رسانی کے عمل میں مصروف ہے۔ تیز بہاؤ میں کتنے لوگ بہے ہیں، اس کے بارے میں آفیشیل جانکاری فی الحال نہیں دی گئی ہے۔ دوسری طرف مغربی سنگھ بھوم ضلع کے صدر چائباسہ علاقہ کے گوٹوسائی میں بارش کی وجہ سے ایک کچا مکان گر جانے سے کالی لوہاری نامی ایک خاتون کی موت ہو گئی۔ یہ واقعہ ہفتہ کی صبح میں پیش آیا۔

جمشید پور میں گزشتہ 48 گھنٹے سے ہو رہی بارش کی وجہ سے سورن ریکھا اور کھرکئی ندی کے ساحلی علاقے میں سیلاب جیسے حالات ہیں۔ کدما کے ساحلی علاقے میں نالے کا پانی گھروں میں گھس گیا ہے۔ لوگ گھر چھوڑنے کو مجبور ہو گئے ہیں۔ خبر ملنے کے بعد ڈپٹی کمشنر وجئے جادھو متاثرہ علاقے میں پہنچے اور متاثرہ لوگوں کو قریبی کمیونٹی سنٹر میں منتقل کیا جا رہا ہے۔ شہر کے جگسلائی اور باگبیڑا علاقے کے بھی سینکڑوں گھروں میں پانی گھس گیا ہے۔ لوگ اپنے گھروں کو خالی کر محفوظ مقامات کی طرف جا رہے ہیں۔

موسمیاتی مرکز رانچی نے مغربی سنگھ بھوم، سمڈیگا اور سرائے کیلا کھرساواں، رانچی، رام گڑھ، گملا، ہزاری باغ، کھونٹی و بوکارو کے ساتھ ساتھ شمالی حصے یعنی دیوگھر، دمکا، جامتاڑا، دھنباد، گریڈیہہ، گوڈا، پاکوڑ و صاحب گنج کے کچھ حصوں میں تیز بارش کو لے کر یلو الرٹ جاری کیا ہے۔ ماہر موسمیات ابھشیک آنند نے کہا کہ خلیج بنگال سمیت بنگلہ دیش اور میانمار میں کم دباؤ والا علاقہ بن گیا ہے جس کی وجہ سے لگاتار بارش ہو رہی ہے۔