بی جے پی کا نالوں سے گاد نکالنے کا دعویٰ جھوٹا نکلا، ایک ہی بارش میں ڈوب گئی دہلی: دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے بی جے پی حکومت پر شدید تنقید کرتے ہوئے کہا ہے کہ 30 مئی تک نالوں سے گاد نکالنے کا دعویٰ بالکل جھوٹا اور کھوکھلا ہے کیونکہ زمینی سطح پر کوئی بھی کام شروع نہیں کیا گیا ہے۔ انہوں نے کہا کہ ایک گھنٹے کی بے وقت بارش نے دہلی کو ڈبو دیا، جس کے بعد بی جے پی کی دہلی حکومت کے پی ڈبلیو ڈی وزیر پرویش ورما کے دعوے محض بیان بازی ثابت ہو رہے ہیں۔

دیویندر یادو نے کہا کہ بی جے پی حکومت کے قیام کے تین ماہ بعد بھی وزیر اعلیٰ ریکھا گپتا اور ان کے وزراء صرف وعدے کر رہے ہیں لیکن عملی اقدامات نہ ہونے کے برابر ہیں۔ انہوں نے کہا کہ نہ نالوں کی صفائی ہوئی، نہ گاد نکالی گئی اور نہ ہی سڑکوں پر جمع پانی کے نکاس کا کوئی بندوبست کیا گیا، جس کے سبب ایک معمولی بارش نے دہلی کو پانی پانی کر دیا۔

انہوں نے الزام لگایا کہ وزیر اعلیٰ نے صرف متمول علاقوں جیسے مَجنوں کا ٹیلا اور گالف لنک کا دورہ کیا، جب کہ دہلی کے پسماندہ علاقوں جیسے مشرقی، مغربی، شمالی، شمال مشرقی اور جنوبی دہلی کی جے جے کالونیوں میں عوام شدید مشکلات کا سامنا کر رہے ہیں۔ ان کا کہنا تھا کہ یہ حکومت تین ماہ میں ہی ناکام ثابت ہو چکی ہے۔

دیویندر یادو نے مزید کہا کہ بی جے پی میں پھیلا بدعنوانی کا کلچر دہلی میونسپل کارپوریشن کو بھی کھوکھلا کر چکا ہے۔ ان کے مطابق دہلی میں ٹرپل انجن حکومت ہونے کے باوجود ترقی صرف کاغذوں تک محدود ہے۔ نالوں کی صفائی ہو یا سڑکوں کی مرمت، ہر کام کا اعلان تو ہو رہا ہے، مگر حقیقت میں کچھ نہیں ہو رہا۔

انہوں نے سوال اٹھایا کہ اگر بی جے پی جانتی تھی کہ پچھلے 11 سال سے دہلی مانسون میں پانی بھراؤ کا شکار رہی ہے، تو حکومت میں آنے کے بعد اس نے صفائی اور گاد نکالنے کا کام کیوں شروع نہیں کیا؟ اب جب عوام متاثر ہو چکی ہے تو وزیر اعلیٰ اور وزیر صرف تاریخوں کا اعلان کر رہے ہیں۔

دیویندر یادو نے یاد دلایا کہ کانگریس کے دور حکومت میں، خاص طور پر شیلا دکشت کی قیادت میں، مئی کے وسط تک تمام نالوں سے گاد نکالنے کا کام مکمل ہو جاتا تھا اور دہلی کو کبھی پانی بھرنے کا سامنا نہیں کرنا پڑا۔

انہوں نے انتباہ دیا کہ اگر بی جے پی حکومت نے کام نہ کیا تو عام آدمی پارٹی کے دور کی ناکامی کی طرح یہ حکومت بھی عوام کے سامنے بے نقاب ہو جائے گی۔ انہوں نے کہا کہ وزیر پی ڈبلیو ڈی پرویش ورما کے دعوے اور دھمکیاں بھی کھوکھلی نکلیں کیونکہ بارش کے بعد کسی بھی افسر کے خلاف کارروائی نہیں کی گئی۔