دہلی کے کالکاجی میں جھگی بستی پر انہدامی کارروائی شروع، 1200 گھروں پر چلیں گے بلڈوزر

دہلی کے کالکاجی میں نوٹس کی میعاد ختم ہونے کے ساتھ ہی آج (بدھ) صبح سویرے بلڈوزر کارروائی شروع ہو گئی۔ ہائی کورٹ سے منظوری ملنے کے بعد کالکاجی بے زمین کیمپ کی جھگی بستی میں 1200 گھروں کو منہدم کیا جا رہا ہے۔ احتجاج کے اندیشے کو دیکھتے ہوئے موقع پر کثیر تعداد میں سلامتی اہلکاروں کو تعینات کیا گیا ہے۔ دہلی پولیس کے ساتھ ہی نیم فوجی دستوں کے جوان بھی موقع پر موجود ہیں۔ ڈی ڈی اے کی طرف سے یہاں تین دنوں کے اندر جھگی جھونپڑیوں کو خالی کرنے کا نوٹس چسپاں کیا گیا تھا۔

دہلی کے کالکاجی علاقے میں موجود بے زمین کیمپ میں بڑی تعداد میں جھگیاں ہیں۔ الزام ہے کہ یہاں بہت سی جھگیوں کو ڈی ڈی اے کی زمین پر تجاوزات کرکے بنایا گیا ہے۔ ہائی کورٹ نے انہیں توڑنے کی منظوری دی تھی جس کے بعد ڈی ڈی اے کی طرف سے تین دنوں کی مہلت دیتے ہوئے نوٹس چسپاں کیا گیا تھا۔ نوٹس میں کہا گیا تھا کہ 10 جون تک جھگیوں کو خالی کر دیا جائے، اس کے بعد توڑ پھوڑ کا کام شروع ہوگا۔

بدھ کی صبح قریب 5 بجے ہی نصف درجن بلڈوزر ایکشن میں نظر آئے۔ بھاری پولیس فورس کے ساتھ پہنچی ٹیموں نے جھگیوں اور پختہ مکانوں کو توڑنا شروع کر دیا۔ زیادہ تر لوگ جھگیوں سے اپنا سامان نکال چکے تھے تو بہت سے لوگ بلڈوزر پہنچنے کے بعد سامان سمیٹتے ہوئے نظر آئے۔

وہیں بلڈوزر کارروائی کو لے کر نوٹس چسپاں کیے جانے کے بعد یہاں سیاست تیز ہو گئی تھی۔ ایک دن پہلے ہی عام آدمی پارٹی کے رہنماؤں اور کارکنوں نے یہاں احتجاجی مظاہرہ کیا۔ سابق وزیر اعلیٰ آتشی مرلینا کو حراست میں لے لیا گیا تھا۔ بلڈوزر کارروائی کی شروعات کے بعد آتشی نے وزیر اعلیٰ ریکھا گپتا کو یاد دلایا کہ انہوں نے کہا تھا کہ مکان دیے بغیر جھگیوں کو نہیں توڑا جائے گا۔

آتشی نے لکھا، ’’صبح صبح 5 بجے سے بے زمین کیمپ میں بی جے پی کا بلڈزور چلنا شروع ہو گیا۔ ریکھا گپتا جی آپ نے تو تین دن پہلے کہا تھا کہ ایک بھی جھگی کو توڑا نہیں جائے گا۔ تو پھر بے زمین کیمپ پر بلڈوزر کیوں چل رہا ہے؟‘‘