دہلی میں اگلے دو دن چلیں گی تیز ہوائیں، پھر ہوگی شدید گرمی

دہلی میں گزشتہ چند دنوں سے گرمی کا زور جاری ہے اور آئندہ دنوں میں بھی موسم کے مزید گرم ہونے کا امکان ہے۔ تاہم، محکمہ موسمیات (آئی ایم ڈی) کے مطابق اگلے دو دن تک دہلی میں تیز ہوائیں چلیں گی، جس سے شہریوں کو گرمی سے کچھ راحت ملے گی۔

محکمہ موسمیات کے مطابق جمعہ (28 مارچ) کو دہلی میں زیادہ سے زیادہ درجہ حرارت 33 ڈگری اور کم سے کم 18 ڈگری سیلسیس رہنے کا امکان ہے۔ تیز ہواؤں کے سبب درجہ حرارت میں معمولی کمی واقع ہو سکتی ہے، جس سے لوگوں کو شدید دھوپ سے قدرے نجات ملے گی۔ تاہم، یہ راحت عارضی ہوگی، کیونکہ 31 مارچ کے بعد درجہ حرارت میں تیزی سے اضافہ متوقع ہے۔

موسمیات کے ماہرین کا کہنا ہے کہ اپریل کے آغاز میں دہلی میں شدید گرمی پڑنے کا امکان ہے۔ 2 اپریل تک دہلی کا درجہ حرارت 38 ڈگری سیلسیس تک پہنچ سکتا ہے، جو معمول سے کہیں زیادہ ہے۔ ماہرین نے خبردار کیا ہے کہ دوپہر کے وقت گھر سے باہر نکلنے سے گریز کیا جائے، کیونکہ تیز دھوپ اور بڑھتا ہوا درجہ حرارت صحت کے لیے نقصان دہ ثابت ہو سکتا ہے۔

دہلی میں 27 مارچ کو زیادہ سے زیادہ درجہ حرارت 36.4 ڈگری سیلسیس ریکارڈ کیا گیا تھا، جو معمول سے 3.8 ڈگری زیادہ تھا۔ اسی دن کم سے کم درجہ حرارت 19.5 ڈگری رہا، جو اوسط سے 1.4 ڈگری زیادہ تھا۔ اس سے قبل 26 مارچ کو دہلی میں درجہ حرارت 38.9 ڈگری تک پہنچ گیا تھا، جو معمول سے 7.4 ڈگری زیادہ تھا۔

دہلی میں ہوا کی کوالٹی بھی تشویشناک حد تک خراب ہو گئی ہے۔ 27 مارچ کو شام 7 بجے ایئر کوالٹی انڈیکس (اے کیو آئی) 263 ریکارڈ کیا گیا، جو ’خراب‘ زمرے میں آتا ہے۔ ماہرین نے شہریوں کو احتیاط برتنے کا مشورہ دیا ہے اور خاص طور پر بچوں اور بزرگوں کو غیر ضروری طور پر باہر نکلنے سے گریز کرنے کی تلقین کی ہے۔

ماہرین نے دہلی والوں کو خبردار کیا ہے کہ مارچ میں ہی شدید گرمی کا احساس ہو رہا ہے، جو مئی جیسی گرمی کا اشارہ ہے۔ شہریوں کو چاہیے کہ وہ گرمی سے بچاؤ کے لیے ابھی سے تیاریاں شروع کر دیں۔ پانی کا زیادہ استعمال کریں، دھوپ میں نکلتے وقت سر کو ڈھانپ کر رکھیں اور ہلکے رنگ کے کپڑے پہنیں۔