دہلی: رہائشی کالونیوں میں 65 ہزار لیٹر یومیہ صلاحیت والے آر او پلانٹ نصب ہوں گے

نئی دہلی: گرمی کے موسم میں بڑھتی ہوئی آبادی اور پانی کی طلب کی وجہ سے دہلی میں آبی وسائل پر دباؤ ہے۔ ایسے حالات میں پانی کی آلودگی پر قابو پانے اور آبادی کے حساب سے پانی کی فراہمی کو یقینی بنانے کے لیے ’جل بورڈ‘ کی جانب سے کوششیں کی جا رہی ہیں۔ اس کے تحت دہلی کی رہائشی کالونیوں میں بڑے آر او پلانٹ لگائے جائیں گے۔

یہ پانی عوام کے لیے بالکل مفت ہوگا۔ ہر آر او مشین میں روزانہ 50000 لیٹر صاف پانی فراہم کرنے کی صلاحیت ہوگی۔ جب پانی کی طلب بڑھ جاتی ہے تو ان کے ذریعے 65 ہزار لیٹر تک پانی پہنچایا جا سکتا ہے۔ ایسے خاندانوں کو آر ایف آئی ڈی کارڈ جاری کیے جائیں گے تاکہ اس کو پنچ کر کے وہ آر اوز واٹر ڈسپنسر سے پانی حاصل کر سکیں۔

پانی کی طلب کے مطابق 10 لیٹر اور 20 لیٹر کی مقدار میں پانی تقسیم کیا جائے گا۔ جہاں پہلے مکینوں کو ٹینکروں سے پانی لینے کے لیے طویل انتظار کرنا پڑتا تھا اب آر او پلانٹس کی تنصیب سے یہ مسئلہ حل ہو جائے گا۔ جے جے کالونیوں کے لوگوں کو صاف پانی کی دستیابی سے راحت ملے گی۔

دہلی جل بورڈ نے اس اسکیم کے پہلے مرحلے میں جے جے کالونیوں میں 30 آر او پلانٹس نصب کرنے کا فیصلہ کیا ہے۔ یہ پلانٹس چوبیس گھنٹے کام کریں گے، تاکہ لوگوں کو پانی کے ٹینکر آنے کا انتظار نہ کرنا پڑے۔ یہ آر او پلانٹس مختلف مقامات پر 8-10 ڈسٹری بیوشن یونٹس سے لیس ہوں گے۔