دہلی میں 30 ڈگری درجہ حرارت، مگر تیز ہوائیں بڑھا رہیں ٹھنڈ کا احساس، جانیے آئندہ ہفتے کا موسم

نئی دہلی: دہلی سمیت شمالی ہندوستان کے کئی علاقوں میں گزشتہ دنوں تیز ہوائیں چلیں، جس سے سردی کا احساس بڑھ گیا تھا، مگر اب درجہ حرارت میں دوبارہ اضافہ ہونے لگا ہے۔ تاہم، مغربی ہمالیائی خطے میں 9 مارچ سے ایک اور مغربی ہوا کے داخل ہونے کے امکانات ہیں، جس کے باعث پہاڑی ریاستوں میں بارش اور برفباری ہو سکتی ہے لیکن میدانی علاقوں میں اس کا زیادہ اثر نہیں پڑے گا۔

ہندوستان کے محکمۂ موسمیات (آئی ایم ڈی) کے مطابق، جمعہ کو آسمان جزوی طور پر ابر آلود رہے گا اور صبح کے وقت دھند چھائی رہ سکتی ہے۔ صبح کے وقت ہواؤں کی رفتار 4 سے 6 کلومیٹر فی گھنٹہ رہنے کا امکان ہے، جو دوپہر میں بڑھ کر شمال مغربی سمت سے 10 سے 12 کلومیٹر فی گھنٹہ تک پہنچ سکتی ہے۔ محکمۂ موسمیات کے مطابق، دہلی میں جمعہ کے روز زیادہ سے زیادہ درجہ حرارت 30 ڈگری سیلسیس اور کم سے کم 13 ڈگری سیلسیس کے آس پاس رہنے کا امکان ہے۔

آئندہ دنوں میں دہلی میں درجہ حرارت میں مسلسل اضافہ متوقع ہے۔ موسمیاتی ماہرین کا کہنا ہے کہ اگلے پانچ دنوں میں درجہ حرارت میں تقریباً 4 ڈگری کا اضافہ ہو سکتا ہے۔ 7 مارچ کو دہلی کا کم سے کم درجہ حرارت 13 ڈگری سیلسیس رہے گا، جو 12 مارچ تک بڑھ کر 17 ڈگری سیلسیس تک پہنچ سکتا ہے۔ اسی طرح، 11 مارچ کو دہلی کا زیادہ سے زیادہ درجہ حرارت 34 ڈگری سیلسیس تک پہنچنے کا امکان ہے۔ تاہم، پورے ہفتے کے دوران صبح کے وقت دھند چھائی رہنے کی توقع ہے۔