دہلی میٹرو: 3 اسٹیشنوں کا بدلا جائے گا نام، وزیر اعلی ریکھا گپتا کا اعلان

دہلی میٹرو کو لے کر بڑی خبر سامنے آئی ہے۔ دہلی کے 3 میٹرو اسٹیشنوں کا نام بدلا جائے گا۔ راج کلش یاترا میں شامل وزیر اعلیٰ ریکھا گپتا نے یہ اعلان کیا ہے۔ ریکھا گپتا کا کہنا ہے کہ پیتم پورہ میٹرو اسٹیشن، زیر تعمیر پرشانت وہار میٹرو اسٹیشن اور حیدرپور بادلی موڑ میٹرو اسٹیشن کے نام بدلے جائیں گے۔ ان کا کہنا ہے کہ مقامی شناخت کو واضح کرنے اور مسافروں کی سہولیات کے پیش نظر تینوں میٹرو اسٹیشنوں کے نام تبدیل کیے گئے ہیں۔

ریکھا گپتا کا کہنا ہے کہ مسافروں کی سہولت کے لیے تینوں میٹرو اسٹیشنوں کے نام تبدیل کیے جا رہے ہیں۔ پیتم پورہ اسٹیشن اب مدھوبن چوک کے نام سے جانا جائے گا۔ زیر تعمیر پرشانت وہار میٹرو اسٹیشن کا نام بدل کر نارتھ پیتم پورہ/پرشانت وہار کر دیا گیا ہے۔ جبکہ حیدرپور بادلی موڑ کا نام بدل کر حیدرپور گاؤں رکھ دیا گیا ہے۔ ساتھ ہی انہوں نے کہا کہ میکس اسپتال روڈ کو چوڑا کرنے اور انڈر پاس بنانے کا کام بھی تیزی سے چل رہا ہے، جس سے یہاں کے رہنے والوں کو بہتر نقل و حمل کی سہولت ملیں گی۔ حیدرپور گاؤں ترقی یافتہ دہلی کی نئی پہچان کی علامت بن رہا ہے، جس میں روایت کا احترام کیا جا رہا ہے اور جدید سہولیات کو ترجیح دی جا رہی ہے۔

نئے ناموں کا اعلان ہوتے ہی پیتم پورہ اور آس پاس کے علاقوں میں اس فیصلے کو لے کر بحث تیز ہو گئی ہے۔ کئی مقاملی لوگوں کا کہنا ہے کہ ’مدھوبن چوک‘ کا نام علاقے میں پہلے ہی سے مشہور ہے، ایسے میں اسٹیشن کا نام بھی وہی ہونا ایک لاجیکل فیصلہ ہے۔ جبکہ کچھ لوگوں نے پوچھا کہ ہمارے روٹ کا نام تو نہیں بدلا؟ سوشل میڈیا پلیٹ فارم پر بھی نام کی تبدیلی کا معاملہ کافی ٹرینڈ کر رہا ہے۔ قابل ذکر ہے کہ نئی میٹرو میپنگ کے اپڈیٹ ہونے کے بعد موبائل ایپ، اسٹیشن بورڈ، روٹ پلانر اور اناؤنسمنٹ ہر جگہ نئے تبدیل شدہ نام نظر آنے لگیں گے۔ ابتدائی ایام میں تھوڑی بہت الجھن ہو سکتی ہے، لیکن حکومت کا کہنا ہے کہ کچھ ہفتوں میں مسافروں کو نئے نام کی عادت پڑ جائے گی۔