پھانسی سے پہلے نربھیا کے مجرموں کا انٹرویو لینا چاہتا ہے میڈیا

دہلی ہائی کورٹ نے ایک میڈیا ہاؤس کی عرضی پر تہاڑ جیل انتظامیہ کو ہدایت دی ہے کہ وہ جمعرات تک قانون کے مطابق سبھی دلیلوں پر غور کر کے یہ فیصلہ لے کہ میڈیا ہاؤس نربھیا کے قصورواروں کا انٹرویو لے سکتا ہے یا نہیں۔ دراصل ایک میڈیا ہاؤس نے گزشتہ 25 فروری کو تہاڑ جیل انتظامیہ سے نربھیا کے قصورواروں کا انٹرویو لینے کی اجازت طلب کی تھی، جسے جیل افسران نے خارج کر دیا تھا۔

انٹرویو لینے سے متعلق درخواست قبول نہیں کیے جانے کے بعد میڈیا ہاؤس نے تہاڑ جیل انتظامیہ کے ذریعہ اس کی درخواست کو خارج کرنے کو دہلی ہائی کورٹ میں چیلنج دیتے ہوئے پھانسی سے پہلے نربھیا کے چاروں قصورواروں کے انٹرویو کی اجازت مانگی ہے۔ عرضی میں دعویٰ کیا گیا ہے کہ نربھیا کے قصورواروں کے انٹرویو کے پیچھے اس کا مقصد مستقبل میں سماج کو ایک پیغام دینا ہے۔ یہاں قابل غور ہے کہ سبھی قصورواروں کو 20 مارچ کو پھانسی کے لیے ڈیتھ وارنٹ جاری ہو چکا ہے۔

بدھ کو میڈیا ہاؤس کی عرضی پر سماعت کرتے ہوئے جسٹس نوین چاؤلہ کی سنگل بنچ نے تہاڑ انتظامیہ کو ہدایت جاری کرتے ہوئے کہا کہ وہ عرضی پر قانون کے مطابق غور کرے اور کل تک اس پر کوئی مدلل فیصلہ لے کر مطلع کرے۔ اس سے پہلے گزشتہ جمعرات کو میڈیا ہاؤس کی عرضی پر سماعت کرتے ہوئے کورٹ نے تلخ تبصرہ کرتے ہوئے کہا تھا کہ نربھیا کے قصورواروں نے کئی نظام کا مذاق اڑایا ہے، اس لیے ان کا حوصلہ نہیں بڑھایا جانا چاہیے۔

قابل ذکر ہے کہ نربھیا کے سبھی قصورواروں مکیش، پون، ونے اور اکشے کو 20 مارچ کو پھانسی دینے کے لیے عدالت نے ڈیتھ وارنٹ جاری کر دیا ہے۔ ان سبھی مجرموں کی سزا کے خلاف اپیل کے سبھی متبادل ختم ہو چکے ہیں۔ ایسے میں اس بار ان کے ڈیتھ وارنٹ پر عمل ہونا یقینی نظر آ رہا ہے۔