دہلی - این سی آر میں اگلے چھ دنوں تک شدید گرمی کی لہر جاری رہنے کا امکان: محکمہ موسمیات

نئی دہلی: راجدھانی کے عوام کو عنقریب گرمی کی لہر سے کسی قسم کی راحت کی امید نہیں ہے، کیونکہ محکمہ موسمیات کے مطابق دہلی این سی آر میں اگلے 6 دنوں تک شدید گرمی کی لہر برقرار رہنے کا امکان ہے۔ محکمہ موسمیات کے مطابق اس دوران زیادہ سے زیادہ درجہ حرارت 40 سے 42 ڈگری سیلسیس کے آس پاس رہے گا۔ محکمہ نے کہا کہ راجدھانی میں 9 سے 11 اپریل تک زیادہ سے زیادہ درجہ حرارت 42 ڈگری سیلسیس کے آس پاس رہنے کا امکان ہے۔

محکمہ موسمیات کے مطابق جمعرات کو یہاں زیادہ سے زیادہ درجہ حرارت 40 ڈگری سیلسیس اور کم سے کم درجہ حرارت 19.4 ڈگری سیلسیس رہا، جوکہ معمول کے برابر ہے۔ راجدھانی میں آج صبح 8 بجے تک نمی کا تناسب 39 فیصد رہا۔ دریں اثنا سینٹرل پالیوشن کنٹرول بورڈ کے مطابق دہلی کا ایئرانڈیکس آج خراب زمرے میں رہا، جو صبح 10 بجے تک 265 درج کیا گیا۔

خیال رہے کہ دہلی میں مارچ کے مہینے میں شدید گرمی نے ریکارڈ توڑ ڈالے ہیں، اس سے پہلے کئی سال پہلے ایسی گرمی تھی۔ دہلی کی مارچ کی گرمی نے مئی جون کی گرمی کو بھی پیچھے چھوڑ دیا۔ دہلی کی گرمی کے بڑھنے کی وجہ مارچ میں بارش کا نہ ہونا بھی ہے، کیونکہ مارچ میں ہونے والی بارش کی وجہ سے ہر سال درجہ حرارت کم ہو جاتا ہے۔ تاہم اب جب کہ بارش نہیں ہوئی، اپریل میں بھی شدید گرمی پڑ رہی ہے۔