دہلی: اشوک وِہار میں پھر بلڈوزر کارروائی، کئی جھگیاں گرائی گئیں، کثیر تعداد میں پولیس فورس تعینات

دہلی میں اشوک وِہار کے جیلروالا باغ میں آج (پیر) ڈی ڈی اے کی طرف سے جھگیوں کو ہٹایا جا رہا ہے۔ اس سے پہلے بھی اسی جگہ پر مہم چلائی گئی تھی جس میں سینکڑوں جھگیاں گرائی گئی تھیں۔ آج صبح ڈی ڈی اے کی ٹیم جیلر باغ پر پہنچی جہاں پر اس نے اپنی زمین پر سینکڑوں جھگیوں کے ذریعہ ناجائز قبضہ کرنے کی بات کہی ہے۔ آج یہاں تقریباً 200 سے زائد جھگیوں کو گرایا جانا ہے۔ حالات پر قابو رکھنے یا کسی بھی طرح کے احتجاج کا مقابلہ کرنے کے لیے دہلی پولیس اور پیرا ملٹری فورس کی تعیناتی کی گئی ہے۔

اس سے پہلے دہلی کے کالکاجی میں بھی بلڈوزر کارروائی کی گئی تھی۔ اس دوران عام آدمی پارٹی کے رہنماؤں نے اس کی مخالفت کی تھی۔ ساتھ ہی دہلی میں جھگی بستیوں اور غریبوں کے گھروں کو توڑے جانے کا الزام لگاتے ہوئے عآپ نے بڑی تحریک چلانے کا اعلان کیا۔ پارٹی نے ’چلو جنتر منتر‘ نامی ایک احتجاجی مظاہرہ کا انعقاد کیا ہے جو 29 جون کو صبح 10 بجے دہلی کے جنتر منتر پر ہوگا۔

عآپ کے مطابق اس مظاہرہ کا مقصد دہلی کی جھگی بستیوں کو بلڈوزر کارروائی سے بچانا اور غریبوں کو بے گھر ہونے سے روکنا ہے۔ پارٹی کا کہنا ہے کہ دہلی میں غیر قانونی بتا کر کئی جھگی بستیوں کو اُجاڑا جا رہا ہے، جس سے ہزاروں غریب کنبوں کی زندگی بحران کا شکار ہو گئی ہے۔ پارٹی نے بی جے پی کے زیر انتظام دہلی حکومت پر الزام لگایا ہے کہ وہ غریب مخالف پالیسیوں کے تحت جھگیوں کو زبردستی ہٹا رہی ہے۔