دہلی: اشوک وہار میں سہ منزلہ عمارت منہدم، چار بچے اور ایک خاتون ہلاک

نئی دہلی: شمالی دہلی کے اشوک وہار فیز-3 علاقے میں بدھ کو ایک سہ منزلہ عمارت گر گئی جس کے بعد متعدد افراد ملبے میں دب گئے۔ اس حادثہ میں 4 بچوں سمیت 5 افراد ہلاک ہو گئے ہیں جبکہ کم از کم 9 افراز زخمی ہوئے ہیں۔

دہلی فائر بریگیڈ سروس کے ایک افسر نے بتایا کہ صبح 9:25 بجے عمارت کے منہدم ہونے کی اطلاع ملی، جس کے فوراً بعد امدادی ٹیمیں موقع پر پہنچ گئیں۔ افسر کے مطابق دس افراد کو ملبہ سے نکالا گیا جن میں سے 4 بچوں اور ایک خاتون کی موت ہو گئی۔ ایک کی حالت نازک بتائی جا رہی ہے۔

ابھی تک کی جانچ میں انکشاف ہوا ہے کہ ایم سی ڈی نے اس عمارت کو کمزور قرار دیا ہوا تھا۔ میڈیا رپورٹوں کے مطابق عمارت میں ایک درخت بھی تھا اور عمارت اس کے سہارے کھڑی ہوئی تھی۔ چونکہ درخت سوکھ چکا تھا جس کی وجہ سے عمارت مزید کمزور ہو گئی اور بھربھرا کر گر گئی ہے۔ اس حادثہ میں دو خاندان متاثر ہوئے ہیں، تمام زخمیوں کو اسپتال میں داخل کرا دیا گیا ہے۔

پولس نے بتایا کہ ملبے کے نیچے کئی اور لوگوں کے دبے ہونے کا خدشہ ہے۔ راحت اور بچاؤ کی ٹیم جائے وقوعہ پر موجود ہے اور ملبہ ہٹانے میں مصروف ہے۔ این ڈی آر ایف کے ترجمان کے مطابق این ڈی آر ایف کی دو ٹیمیں موقع کے لئے روانہ کر دی گئی ہیں۔