ایودھیا میں دلت لڑکی کا بے دردی سے قتل، آنکھیں نکالی گئیں، بغیر کپڑوں کے بھیانک حالت میں لاش ملی

اتر پردیش کے ایودھیا ضلع میں پولیس نے ہفتہ کے روز ایک لاپتہ شیڈول کاسٹ (ایس سی) لڑکی کی برہنہ لاش برآمد کی جس کا بے دردی سے قتل کیا گیا تھا، اس کی آنکھیں نکال لی گئیں تھیں اور اس کے جسم پر کئی زخم تھے۔ نیوز پورٹل ’اے بی پی‘ پر شائع خبر کے مطابق پولیس نے شبہ ظاہر کیا ہے کہ لڑکی کے ساتھ اجتماعی زیادتی کی گئی اور پھر اسے قتل کر دیا گیا۔

ایودھیا پولس کے سرکل آفیسر (سی او) آشوتوش تیواری نے کہا، "پولیس نے جمعہ کو 22 سالہ لڑکی کے لاپتہ ہونے کی شکایت موصول ہونے کے بعد ایف آئی آر درج کی تھی۔ لڑکی کی برہنہ لاش ہفتہ کی صبح برآمد ہوئی۔ پولیس پوسٹ مارٹم رپورٹ کا انتظار کر رہی ہے جس کی بنیاد پر مزید کارروائی کی جائے گی۔

ذرائع کے مطابق لاش انتہائی خوفناک حالت میں تھی جسے دیکھ کر جاں بحق لڑکی کی بڑی بہن اور گاؤں کی دو خواتین بے ہوش ہو گئیں۔ انہوں نے بتایا کہ لڑکی جمعرات کی رات 10 بجے یہ کہہ کر گھر سے نکلی تھی کہ وہ کسی مذہبی تقریب میں جارہی ہے، لیکن وہ واپس نہیں آئی، جس کے بعد گھر والوں نے گاؤں میں اس کی تلاش کی۔

ذرائع کے مطابق اہل خانہ نے جمعہ کو ایودھیا پولیس اسٹیشن میں لڑکی کی گمشدگی کی رپورٹ درج کرائی۔ لواحقین نے الزام لگایا کہ پولیس لڑکی کی سرگرمی سے تلاش کرنے کے بجائے محض رسمی کارروائی کررہی ہے۔ اس نے بتایا کہ ہفتہ کی صبح لڑکی کے بہنوئی کو اس کی لاش گاؤں سے آدھا کلومیٹر دور ایک چھوٹی نہر میں ملی۔ اس نے لاش ملنے کی اطلاع اہل خانہ کو دی جس کے بعد موقع پر لوگوں کی بھیڑ جمع ہوگئی۔

اہل خانہ کے مطابق لڑکی کی آنکھیں نکالی گئی تھیں اور اس کے جسم کی کئی ہڈیاں بھی ٹوٹی ہوئی تھیں۔ اس نے شبہ ظاہر کیا کہ لڑکی کے ساتھ اجتماعی عصمت دری کی گئی اور پھر اسے قتل کر دیا گیا۔ لواحقین نے بتایا کہ لڑکی کی لاش برہنہ حالت میں ملی، اس کی آنکھیں نکالی گئی تھیں، اس کے ہاتھ پاؤں رسی سے بندھے ہوئے تھے اور چہرے اور کھوپڑی پر شدید چوٹوں کے نشانات تھے۔ پولیس نے کہا کہ معاملے کی جانچ کی جا رہی ہے۔