ہندوستانی بحریہ پر ’کورونا وائرس‘ کا بڑا حملہ، 19 جوان پازیٹو پائے گئے

ہندوستان میں بڑھتے کورونا انفیکشن کے درمیان اس کا سایہ ہندوستانی بحریہ پر بھی پڑنے کی خبریں سامنے آ رہی ہیں۔ بتایا جا رہا ہے کہ مغربی بحریہ کمان کے ساحل پر موجود لاجسٹک اور ایڈمنسٹریٹو سپورٹ بیس آئی این ایس آنگرے پر 19جوان کورونا پازیٹو پائے گئے ہیں۔ دعویٰ کیا جا رہا ہے کہ یہ تعداد مزید ایک بڑھ کر 20 بھی ہو سکتی ہے۔

ممبئی کے ساحل پر موجود آئی این ایس آنگرے میں ملے سبھی 19 کورونا پازیٹو جوانوں کو بحریہ اسپتال میں داخل کرا دیا گیا ہے۔ بحریہ میں کورونا انفیکشن کا یہ پہلا معاملہ ہے۔ کورونا کے پازیٹو کیس ملنے کے بعد اب ان لوگوں کی تلاش شروع کی گئی ہے جو ان انفیکشن نوجوانوں کے رابطہ میں آئے تھے۔

ابھی تک کی جانچ میں پتہ چلا ہے کہ لاک ڈاؤن کی وجہ سے یہ فوجی اپنے اپنے گھروں میں ہی تھے اور باہر کسی کے بھی رابطہ میں نہیں آئے تھے۔ حالانکہ یہ واضح نہیں ہو سکا ہے کہ انھوں نے آئی این ایس آنگرے میں آنے والے کشتی رانوں یا افسروں میں یہ انفیکشن پھیلایا ہے یا نہیں۔ بتایا جا رہا ہے کہ جو بحری جوان کورونا پازیٹو پائے گئے ہیں انھیں ممبئی کے بحریہ اسپتال آئی این ایچ ایس اشونی میں کوارنٹائن کیا گیا ہے۔