یومِ جمہوریہ پر پاکستانی اسمگلروں کی سازش ناکام، پنجاب میں سرحد پار سے بھیجی گئی 3 کلو ہیروئن برآمد

یومِ جمہوریہ پر آج ہندوستانی سیکورٹی فورس نے پاکستان کے اسمگلروں کی ڈرگس بھیجنے کی ناپاک کوشش کو ناکام کر دیا۔ بی ایس ایف (بارڈر سیکورٹی فورس) نے پنجاب کے فیروز پور میں ہند-پاک سرحد پر اس پار سے بھیجی گئی تقریباً 3 کلو ہیروئن کو ضبط کر اسمگلروں کے منصوبے پر پانی پھیر دیا۔ بی ایس ایف نے تصدیق کی ہے کہ سیکورٹی فورسز نے بڑی مقدار میں نشیلی اشیا برآمد کی ہیں۔

بی ایس ایف نے بتایا کہ 26 جنوری کو علی الصبح پنجاب کے فیروز پور ضلع میں شدید کہرے کے درمیان سرحد پر تعینات مستعد بی ایس ایف جوانوں نے ٹنڈی والا گاؤں کے پاس پڑنے والے علاقہ میں بین الاقوامی بارڈر ٹریک پر انسانی پیروں کے نشان دیکھے۔ اس کے بعد علاقے کی تلاشی کے دوران جوانوں نے پیلے چپکنے والے ٹیپ سے لپٹے 3 پیکٹ برآمد کیے۔

ایک افسر نے بتایا کہ پیکٹ کو کھولنے پر اس میں سے تقریباً 3 کلو ہیروئن برآمد کی گئی۔ ہیروئن کی قیمت کروڑوں روپے میں اندازہ کی جا رہی ہے۔ فی الحال آس پاس کے علاقے میں بی ایس ایف کے ذریعہ تلاشی مہم چلائی جا رہی ہے تاکہ اس طرح کی کسی بھی ناپاک سازش کو ناکام بنایا جا سکے۔ یہ بھی پتہ لگانے کی کوشش کی جا رہی ہے کہ کہیں یہ ہیروئن ڈرون کے ذریعہ تو نہیں بھیجی گئی ہے۔

واضح رہے کہ ان دنوں شدید کہرے کی وجہ سے سرحد پر پاکستانی اسمگلروں کی سرگرمیاں بڑھ گئی ہیں۔ اکثر اس دوران ڈرون کے ذریعہ ہتھیار اور ڈرگس بھیجے جانے کے معاملے سامنے آتے ہیں۔ یہی وجہ ہے کہ بی ایس ایف ان دنوں سرحد پر آپریشن الرٹ چلا رہی ہے۔ گزشتہ دنوں خصوصاً پنجاب میں موجود ہند-پاک سرحد پر سیکورٹی فورسز نے کثیر مقدار میں ڈرون سے بھیجی گئی ڈرگس اور اسلحے برآمد کیے ہیں۔