خواتین ریزرویشن پر عملدرآمد نہ ہونے پر کانگریس کا احتجاج، حکومت پر وعدہ خلافی کا الزام

نئی دہلی: مہیلا کانگریس کی صدر الکا لامبا نے بھارتیہ جنتا پارٹی (بی جے پی) حکومت پر خواتین ریزرویشن ایکٹ کے نفاذ میں تاخیر کا الزام عائد کرتے ہوئے کہا کہ یہ خواتین کے ساتھ دھوکہ ہے۔ انہوں نے اعلان کیا کہ حکومت پر دباؤ ڈالنے کے لیے 10 مارچ 2025 کو دہلی کے جنتر منتر پر احتجاجی مظاہرہ کیا جائے گا۔

الکا لامبا نے کانگریس کے نئے ہیڈکوارٹر اندرا بھون میں خواتین کے عالمی دن کے موقع پر ایک تقریب سے خطاب کرتے ہوئے کہا کہ پارلیمنٹ میں خواتین ریزرویشن کا قانون تو پاس ہو گیا، مگر حکومت کی نیت اس پر عملدرآمد کی نہیں بلکہ خواتین کو محض لالی پاپ دینے کی ہے۔ انہوں نے کہا کہ کانگریس نے اس قانون کے حق میں پوری قوت سے آواز بلند کی تھی، مگر بی جے پی حکومت اسے نافذ کرنے میں سنجیدہ نظر نہیں آ رہی۔

انہوں نے کہا کہ خواتین ملک کی ’نصف آبادی‘ ہیں اور انہیں ان کے حقوق دینے میں مزید تاخیر ناقابل قبول ہے۔ انہوں نے دعویٰ کیا کہ سابق وزیر اعظم راجیو گاندھی نے خواتین کی ترقی کے لیے شاندار اقدامات کیے تھے، جس کے نتیجے میں آج ملک بھر میں 15 لاکھ سے زائد خواتین پنچایتوں، میونسپل کونسلز اور دیگر منتخب اداروں میں عوامی نمائندگی کر رہی ہیں۔ ان کا کہنا تھا کہ ہمیں ان خواتین تک پہنچ کر انہیں یہ یاد دلانا ہوگا کہ ان کے سیاسی سفر میں کانگریس کا کیا کردار رہا ہے۔

مہیلا کانگریس کی صدر نے ریاستی حکومتوں پر بھی تنقید کرتے ہوئے کہا کہ خواتین کے عالمی دن کے موقع پر انہیں اعزازات دیے جاتے ہیں لیکن اگر وہی حکومتیں خواتین پر ہونے والے مظالم کو روکنے میں ناکام رہتی ہیں، تو یہ عمل محض ایک دکھاوا بن کر رہ جاتا ہے۔ انہوں نے کہا کہ خواتین کی اصل ترقی کے لیے ضروری ہے کہ انہیں سیاسی اور سماجی طور پر مزید بااختیار بنایا جائے۔

الکا لامبا نے یاد دلایا کہ کانگریس کی جنرل سکریٹری پرینکا گاندھی نے اتر پردیش اسمبلی انتخابات میں 40 فیصد ٹکٹ خواتین کو دیے، حالانکہ دیگر سیاسی جماعتوں نے پیسہ اور طاقت استعمال کر کے ان کے خلاف سازشیں کیں۔ تاہم، پرینکا گاندھی آج بھی خواتین کے حقوق کے لیے برسرپیکار ہیں، جو قابل تعریف ہے۔

انہوں نے مزید کہا کہ بی جے پی حکومت نے خواتین ریزرویشن ایکٹ کو راجیہ سبھا میں پاس کرانے کے بعد اس پر عملدرآمد روک دیا ہے۔ انہوں نے کہا کہ ’’یہ قانون تو پاس ہو چکا، پھر اس پر عمل کیوں نہیں ہو رہا؟ یہ خواتین کے ساتھ سراسر ناانصافی اور دھوکہ ہے۔‘‘