ترن تارن ضمنی انتخاب کے لیے کانگریس نے کرنبیر سنگھ برج کو بنایا امیدوار

پنجاب کی ترن تارن اسمبلی سیٹ کے ضمنی انتخاب کے لیے سیاسی سرگرمیاں تیز ہوگئی ہیں حالانکہ الیکشن کی تاریخ کا ابھی اعلان نہیں ہوا ہے۔ اس سلسلے میں کانگریس پارٹی نے کرنبیر سنگھ برج کو اپنا امیدوار نامزد کیا ہے۔ کانگریس نے گزشتہ شب ان کی نامزدگی کا اعلان کیا۔ یہ سیٹ اے اے پی ایم ایل اے کشمیر سنگھ سوہل کے انتقال کی وجہ سے خالی ہوئی تھی۔ سوہل 27 جون 2025 کو انتقال کر گئے جس کے بعد اس سیٹ پر ضمنی انتخاب کرانا ضروری ہوگیا ہے۔

اس دوران پنجاب کانگریس کے رکن پارلیمنٹ سکھجیندر سنگھ رندھاوا نے کرنبیر سنگھ برج کو امیدوار اعلان کئے جانے پر مبارکباد دی ہے۔ سوشل میڈیا’ ایکس‘پراپنی ایک پوسٹ میں پنجاب کانگریس نے دعویٰ کیا ہے کہ پارٹی ضمنی انتخاب بھاری اکثریت سے جیتنے کے لیے تیار ہے۔

الیکشن کمیشن نے تاحال ضمنی انتخاب کی تاریخ کا اعلان نہیں کیا ہے۔ مگر اہم سیاسی پارٹیوں نے اپنی اپنی تیاریاں تیز کردی ہیں۔ معلوم ہوکہ 2022 کے اسمبلی انتخابات میں اس سیٹ پرعام آدمی پارٹی (اے اے پی) نے جیت درج کی تھی، جس میں اکالی دل دوسرے نمبر پر اور کانگریس تیسرے نمبر پر آئی تھی۔

سیاسی جماعتوں نے الیکشن کی تاریخ کے اعلان سے پہلے ہی کمر کس لی ہے۔ اس سے قبل جمعہ کو پنجاب کے وزیر اعلی بھگونت مان نے سابق ایم ایل اے ہرمیت سنگھ سندھو کو اس سیٹ کے لیے نامزد کیا تھا۔ ہرمیت تین بار ایم ایل اے رہ چکے ہیں۔ وہ 2002 میں آزاد امیدوار کے طور پر منتخب ہوئے تھے۔ اس کے بعد وہ 2007 اور 2012 میں شرومنی اکالی دل کے ٹکٹ پر دوبارہ منتخب ہوئے۔ انہوں نے 2017 اور 2022 کا الیکشن لڑا لیکن ہار گئے۔ وہ جولائی میں عام آدمی پارٹی میں شامل ہوئے تھے۔

بھارتیہ جنتا پارٹی نے ہرجیت سنگھ سندھو کو اور شرومنی اکالی دل نے سکھوندر کور رندھاوا کو نامزد کیا ہے۔ اکالی دل نے جولائی میں اپنے امیدوار کا اعلان کیا تھا۔ سیاسی ماہرین کی مانیں تو ترن تارن اسمبلی حلقے کے زمینی حالات کانگریس کے حق میں نظر آرہے ہیں اس لئے یہاں کانگریس پارٹی کے عہدیداران کے ساتھ ساتھ کارکنان بھی الیکشن کے لیے پُرجوش ہیں۔