امت شاہ کے ڈاکٹر امبیڈکر پر تبصرے کے خلاف کانگریس کا احتجاج جاری، منیکم ٹیگور نے لوک سبھا میں پیش کیا التوا کا نوٹس

نئی دہلی: کانگریس کے رکن پارلیمنٹ منیکم ٹیگور نے مرکزی وزیر داخلہ امت شاہ کی طرف سے آئین پر بحث کے دوران ڈاکٹر بھیم راؤ امبیڈکر کے بارے میں کیے گئے توہین آمیز تبصروں کے خلاف لوک سبھا میں التوا کا نوٹس پیش کیا۔ انہوں نے نوٹس کے ذریعے امبیڈکر کی توہین پر ایوان میں فوری طور پر بحث کرانے کا مطالبہ کیا۔

انہوں نے وزیر داخلہ کی ان غیر مناسب باتوں کی مذمت کرتے ہوئے ان سے فوری طور پر معافی مانگنے اور اپنے عہدے سے استعفیٰ دینے کا بھی مطالبہ کیا۔ منیکم ٹیگور نے اپنے نوٹس میں کہا کہ وہ امت شاہ کے ڈاکٹر بھیم راؤ امبیڈکر کے خلاف کیے گئے توہین آمیز تبصروں کی سختی سے مذمت کرتے ہیں، جو ہندوستان کے آئین کے معمار اور سماجی انصاف کے علمبردار ہیں۔ ٹیگور کا کہنا تھا کہ ان تبصروں سے نہ صرف ڈاکٹر امبیڈکر کی توہین ہوئی ہے بلکہ یہ پورے آئین اور ہندوستان کے عوام کی بھی توہین ہے۔

ٹیگور نے کہا، ’’میں اس بات کی پرزور مخالفت کرتا ہوں کہ وزیر داخلہ نے ڈاکٹر امبیڈکر کی شخصیت اور ان کے کام کے خلاف توہین آمیز تبصرے کیے ہیں۔ ان کا مقصد نہ صرف امبیڈکر کی تضحیک کرنا تھا بلکہ آئین کے ان اصولوں کا مذاق اڑانا تھا جنہیں امبیڈکر نے اپنی زندگی بھر کی جدوجہد کے ذریعے پروان چڑھایا۔‘‘

ٹیگور نے مزید کہا کہ ان تبصروں سے نہ صرف سماجی انصاف اور مساوات کے اصولوں کی توہین ہوئی ہے بلکہ ان سے ہندوستانی عوام کی عظمت اور ان کے حقوق کے بارے میں ایک سنگین پیغام گیا ہے۔ ان کا کہنا تھا کہ ڈاکٹر امبیڈکر نے جس محنت اور لگن سے ہندوستانی معاشرے میں مساوات کے اصولوں کو فروغ دیا، اس کی توہین کسی صورت قابل قبول نہیں ہے۔

یاد رہے کہ چند دن قبل مرکزی وزیر داخلہ امت شاہ نے آئین پر بحث کے دوران ڈاکٹر امبیڈکر کا نام لیتے ہوئے کہا تھا کہ ’’امبیڈکر کا نام لینا اب فیشن بن چکا ہے‘‘۔ انہوں نے اپوزیشن جماعتوں پر کڑی تنقید کرتے ہوئے کہا تھا کہ اگر وہ اتنی بار بھگوان کا نام لیتے تو انہیں سات جنم تک سورگ مل جاتا۔ ان تبصروں کے بعد اپوزیشن کی طرف سے شدید ردعمل سامنے آیا اور وزیر داخلہ سے معافی اور ان کے استعفیٰ کا مطالبہ کیا گیا۔

کانگریس نے اس معاملے کو شدت سے اٹھایا ہے اور اس بات پر زور دیا ہے کہ وزیر داخلہ کی یہ غیر ذمہ دارانہ اور توہین آمیز باتیں ہندوستان کے آئین اور ڈاکٹر امبیڈکر کی جدوجہد کے ساتھ سنگین مذاق ہیں۔ پارٹی نے اس بات کی بھی تصدیق کی ہے کہ وہ اس معاملے کو پارلیمنٹ میں اور اس کے باہر بھی اٹھائیں گے۔ اس سلسلہ میں کانگریس پارٹی آج ملک بھر میں احتجاج کر رہی ہے۔