کشتواڑ سانحہ: بادل پھٹنے سے 56 ہلاک، 300 سے زائد محفوظ مقام پر منتقل، 200 سے زیادہ اب بھی لاپتہ

جموں و کشمیر کے ضلع کشتواڑ کے چشوتی گاؤں میں جمعرات کو بادل پھٹنے کے بعد ہر طرف تباہی کا منظر ہے۔ حکام کے مطابق اب تک 56 افراد کی جان جا چکی ہے جبکہ 300 سے زائد لوگوں کو محفوظ مقام پر منتقل کر کے بچا لیا گیا ہے۔ اس کے باوجود 200 سے زیادہ افراد تاحال لاپتہ ہیں اور ان کی تلاش کے لیے بڑے پیمانے پر امدادی کارروائیاں جاری ہیں۔

یہ سانحہ مژھل یاترا کے راستے پر اس وقت پیش آیا جب زائرین مژھل ماتا مندر میں عبادت کے بعد ’لنگر‘ پر کھانے کے لیے رکے ہوئے تھے۔ اچانک آنے والے شدید سیلاب نے اجتماعی باورچی خانے، سکیورٹی چوکی اور آس پاس کے ڈھانچوں کو بہا دیا۔ بادل پھٹنے سے سیلاب کے پانی کے ساتھ بڑے پتھر اور اکھڑے ہوئے درخت بھی بہہ آئے جس نے راستے میں آنے والی ہر چیز کو اپنی لپیٹ میں لے لیا۔

امدادی کارروائیوں میں این ڈی آر ایف، ایس ڈی آر ایف، پولیس اور فوج سمیت متعدد ادارے شریک ہیں۔ اب تک 80 سے زیادہ شدید زخمیوں کو قریبی اسپتالوں میں داخل کیا گیا ہے۔ ہلاک شدگان میں سی آئی ایس ایف کے دو اہلکار بھی شامل ہیں جو اس سکیورٹی پوسٹ پر تعینات تھے جسے پانی بہا لے گیا۔

اس سانحے کے بعد مژھل ماتا یاترا کو فوری طور پر معطل کر دیا گیا ہے جبکہ یومِ آزادی کے تمام مقامی تقریبات بھی منسوخ کر دی گئی ہیں۔

اس آفت کے بیچ ایک دل دہلا دینے والا منظر اس وقت سامنے آیا جب اسپتال میں ہوش میں آنے کے فوراً بعد بھارت بھوشن نامی شخص نے اپنی 23 سالہ بیٹی گہنا رینہ کی تلاش شروع کر دی۔ ان کا کہنا تھا، "میں صرف یہ جاننا چاہتا ہوں کہ میری بیٹی کہاں ہے، وہ لاپتہ ہے۔" بھارت بھوشن اور ان کی بیٹی اس وقت مژھل ماتا مندر میں عبادت کے لیے گئے ہوئے تھے جب یہ تباہی پیش آئی۔

ایک عینی شاہد گنیش نے بتایا، ’’ہم نالے کے کنارے لنگر پر ناشتے کا انتظار کر رہے تھے کہ اچانک لوگ گھبراہٹ میں شور مچانے لگے اور سب کو محفوظ مقام پر جانے کو کہا۔ چند لمحوں بعد پانی کا ایک تیز ریلا آیا جس کے ساتھ پتھر اور درخت بھی بہہ آئے اور سب کچھ دب گیا۔‘‘

گنیش کے مطابق وہ دو بڑے پتھروں کے بیچ پھنس جانے کی وجہ سے بچ گئے۔ انہوں نے کہا کہ لنگر کا مقام لوگوں سے بھرا ہوا تھا، کچھ لوگ یاترا پر جا رہے تھے اور کچھ واپس آ رہے تھے، اس لیے ملبے میں کتنے لوگ دبے ہوں گے اس کا اندازہ لگانا مشکل ہے۔

حکام کے مطابق بادل پھٹنے سے آنے والے پانی اور ملبے نے گاڑیاں کچل دیں اور بڑے پیمانے پر نقصان پہنچایا۔ خراب موسم کے باعث ریسکیو ہیلی کاپٹر استعمال نہیں کیے جا سکے اور نہ ہی فضائی طور پر اہلکاروں کو اتارا جا سکا، تاہم زمینی سطح پر آپریشن جاری ہے۔