چیف جسٹس آف انڈیا بی آر گوئی نے اپنے جانشیں کے طور پر جسٹس سوریہ کانت کے نام کی سفارش پیش کر دی

چیف جسٹس آف انڈیا (سی جے آئی) جسٹس بی آر گوئی نے اپنے جانشیں کے طور پر جسٹس سوریہ کانت کے نام کی سفارش پیش کر دی۔ انھوں نے جسٹس سوریہ کانت کے نام کو وزارت قانون بھیجا ہے۔ انھوں نے اس سلسلے میں رسمی خط تب لکھا ہے، جب گزشتہ دنوں وزارت قانون نے جسٹس گوئی سے ان کے جانشیں کا نام پیش کرنے کی اپیل کی تھی۔

جسٹس سوریہ کانت، جو سپریم کورٹ کے موجودہ سب سے سینئر جج ہیں اور سینئرٹی میں پہلے مقام پر ہیں، جسٹس گوئی کے سبکدوش ہونے پر چیف جسٹس آف انڈیا کا عہدہ سنبھالیں گے۔ جسٹس بی آر گوئی 23 نومبر کو ریٹائر ہو رہے ہیں۔ ان کے ریٹائر ہونے کے اگلے دن، یعنی 24 نومبر کو جسٹس سوریہ کانت ہندوستان کے 53ویں چیف جسٹس کے طور پر حلف لیں گے۔ جسٹس سوریہ کانت کی مدت کار 14 ماہ پر مشتمل ہوگی، کیونکہ وہ 9 فروری 2027 کو سبکدوش ہوں گے۔ جسٹس گوئی نے مئی 2025 میں ہندوستان کے 52ویں چیف جسٹس کا عہدہ سنبھالا تھا۔

قابل ذکر ہے کہ روایت کے مطابق وزارت قانون چیف جسٹس آف انڈیا سے ان کی سبکدوشی کے تقریباً ایک ماہ قبل جانشیں کا نام طلب کرتا ہے۔ اس کے بعد سی جے آئی کے عہدہ پر فائز شخصیت رسمی طور پر عہدہ چھوڑنے سے تقریباً 30 دن قبل سپریم کورٹ کے سب سے سینئر جج کو یہ عہدہ سنبھالنے کے لیے مناسب مانتے ہوئے ان کی سفارش کرتے ہیں۔ موجودہ سی جے آئی گوئی کی سفارش بھیجے جانے کے بعد امید ہے کہ حکومت جلد ہی جسٹس سوریہ کانت کی تقرری سے متعلق نوٹیفکیشن جاری کرے گی۔

جسٹس سوریہ کانت نے 1984 میں ڈسٹرکٹ کورٹ، ہسار میں لاء کی پریکٹس شروع کی تھی۔ 1985 میں وہ پنجاب اینڈ ہریانہ ہائی کورٹ میں پریکٹس کرنے کے لیے چنڈگڑھ منتقل ہو گئے۔ وہ کانسٹی ٹیوشنل، سروس اور سول امور کے ماہر ہیں۔ ان کی پیدائش 10 فروری 1962 کو ہسار (ہریانہ) میں ایک متوسط طبقہ میں ہوئی تھی۔

سپریم کورٹ کی آفیشیل ویب سائٹ کے مطابق جسٹس سوریہ کانت نے 1981 میں گورنمنٹ پوسٹ گریجویٹ کالج، ہسار سے گریجویشن سے کیا۔ 1984 میں مہرشی دیانند یونیورسٹی (ایم ڈی یونیورسٹی)، روہتک سے لاء میں بیچلر ڈگری حاصل کی۔ انھوں نے کروکشیتر کے ’ڈی ڈی ای‘ سے 2011 میں لاء میں ماسٹر ڈگری حاصل کی تھی۔ وہ کئی یونیورسٹی، بورڈ، کارپوریشن، بینک اور ہائی کورٹ کی بھی نمائندگی کی۔ 7 جولائی 2000 کو وہ ہریانہ کے سب سے نوجوان ایڈووکیٹ جنرل مقرر ہوئے تھے۔

جسٹس سوریہ کانت مارچ 2001 میں سینئر ایڈووکیٹ کی شکل میں نامزد کیے گئے تھے۔ 9 جنوری 2004 کو پنجاب اینڈ ہریانہ ہائی کورٹ کے مستقل جج کی شکل میں پروموشن ہونے تک ہریانہ کے ایڈووکیٹ جنرل کے عہدہ پر رہے۔ 22 فروری 2011 تک لگاتار 2 مدت کار کے لیے 23 فروری 2007 کو نیشنل لاء سروس اتھارٹی کے گورننگ باڈی کے رکن کی شکل میں نامزد کیے گئے تھے۔ وہ 5 اکتوبر 2018 کو ہماچل پردیش ہائی کورٹ کے چیف جسٹس مقرر کیے گئے تھے۔ 24 مئی 2019 کو سپریم کورٹ آف انڈیا کے جج کی شکل میں پرموٹ ہوئے تھے۔ ساتھ ہی 12 نومبر 2024 سے سپریم کورٹ لیگل سروسز کمیٹی کے چیئرمین بھی بنے۔ وہ 9 فروری 2027 کو ریٹائر ہوں گے۔