چھتیس گڑھ: پہاڑی سے ٹکرا کر چارٹرڈ طیارہ تباہ، پائلٹ اور کو-پائلٹ ہلاک

چھتیس گڑھ کے ضلع جَشپور سے ایک انتہائی افسوسناک خبر سامنے آئی ہے۔ پیر کے روز آرا پہاڑی سے ٹکرا کر حادثے کا شکار ہونے والے پرائیویٹ چارٹرڈ طیارہ میں پائلٹ اور کو-پائلٹ کی موت ہو گئی ہے۔ ابتدائی تحقیقات سے پتہ چلا ہے کہ طیارہ پہاڑی کے اونچے حصے سے ٹکرا گیا تھا، جس کے بعد اس میں زبردست آگ لگ گئی۔ حادثے کے بعد انتظامیہ کی جانب سے کی گئی ابتدائی تحقیقات میں اس بات کی تصدیق ہوئی ہے کہ طیارہ اڑانے والے پائلٹ اور ان کے کو-پائلٹ دونوں اس حادثے میں جاں بحق ہو گئے ہیں۔ طیارے میں ان دونوں کے علاوہ کوئی اور مسافر سوار تھا یا نہیں، اس کی تحقیقات ابھی جاری ہے۔ جائے وقوعہ سے جو تصاویر اور ویڈیوز سامنے آئی ہیں، ان میں طیارے کا ملبہ جلتا ہوا دکھائی دے رہا ہے۔

حادثے کی اطلاع ملتے ہی ایس ایس پی لال امید سنگھ سمیت ضلع کے اعلیٰ افسران جائے وقوعہ پر پہنچ گئے ہیں۔ چونکہ حادثہ گھنے جنگل اور پہاڑی علاقے میں پیش آیا ہے، اس لیے امدادی ٹیموں کو ملبے تک پہنچنے اور لاشوں کو نکالنے میں شدید مشکلات کا سامنا کرنا پڑ رہا ہے۔ مقامی پولیس اور انتظامیہ کی ٹیمیں مسلسل امدادی کاموں میں مصروف ہیں۔

رپورٹس کے مطابق طیارہ کافی کم بلندی پر اڑ رہا تھا اور اچانک کنٹرول کھونے یا خراب موسم کی وجہ سے براہ راست آرا پہاڑی کی ڈھلان سے جا ٹکرایا۔ ٹکر اتنی زوردار تھی کہ طیارے کے پرخچے اڑ گئے اور پورے علاقے میں دھوئیں کا غبار چھا گیا۔ انتظامیہ اب طیارے مالکانہ حق اور اس کے پرواز کے روٹ کے بارے میں تکنیکی معلومات اکٹھی کر رہی ہے تاکہ حادثے کی اصل وجوہات کا پتہ لگایا جا سکے۔

قابل ذکر ہے کہ اس سے قبل 23 فروری کو جھارکھنڈ میں رانچی کے قریب بھی ایک ایئر ایمبولنس حادثہ کا شکار ہو گیا تھا۔ اس واقعے میں پائلٹ سمیت 7 افراد کی موقع پر ہی موت ہو گئی تھی۔ میڈیا رپورٹس کے مطابق ایئر ایمبولنس 23 فروری کی شام کو رانچی سے اڑان بھرنے کے چند ہی منٹ بعد حادثے کا شکار ہو گئی تھی۔ ایک ’بیچ کرافٹ کنگ ایئر سی90اے‘ طیارہ جو دہلی جا رہا تھا، اس میں ایک شدید بیمار مریض کے ساتھ میڈیکل اسٹاف اور کریو کے عملہ سوار تھے۔ اس واقعے کی تحقیقات اب بھی جاری ہے۔