چھٹھ تہوار: ’مودی حکومت نے بہاریوں کے ساتھ دھوکہ کیا‘، کانگریس نے محض 1500 خصوصی ٹرینیں چلائے جانے کا کیا دعویٰ

مرکز کی مودی حکومت چھٹھ تہوار کے موقع پر تقریباً 12 ہزار خصوصی ٹرینیں چلائے جانے کا دعویٰ کر رہی ہے، لیکن کانگریس نے اس دعویٰ کو خارج کرتے ہوئے ایک نیا دعویٰ سامنے رکھ دیا ہے۔ کانگریس کا کہنا ہے کہ 12 ہزار خصوصی ٹرینیں نہیں، بلکہ محض 1500 خصوصی ٹرینیں چھٹھ تہوار کے موقع پر چلائی جا رہی ہیں۔ اس طرح کانگریس نے مودی حکومت اور وزیر ریل اشونی ویشنو پر جھوٹ بولنے کا سنگین الزام عائد کر دیا ہے۔

آج ایک پریس کانفرنس کے دوران کانگریس کے سینئر لیڈر اور راجیہ سبھا رکن ڈاکٹر اکھلیش پرساد سنگھ نے کہا کہ ’’چھٹھ ہندو طبقہ کے لیے عقیدت کا سب سے بڑا تہوار ہے۔ یہ تہوار بہار اور بہاریوں کے لیے بے حد خاص ہوتا ہے۔‘‘ وہ آگے کہتے ہیں کہ ’’بہت راحت ملی جب نریندر مودی اور وزیر ریل نے اعلان کیا کہ 12 ہزار ٹرینوں کے ذریعہ لوگوں کو ان کے گھر تک پہنچایا جائے گا، لیکن صرف 1500 ٹرینیں چلائی گئیں۔‘‘ اس بیان کے بعد ڈاکٹر اکھلیش نے کہا کہ ’’مودی حکومت نے انتخاب کے وقت ووٹ لینے کے لیے یہ جھوٹ بولا اور لوگوں کے عقیدہ سے کھلواڑ کیا۔ ہم سب نے دیکھا کہ کس طرح زبردست بھیڑ اور دقتوں کے درمیان لوگ اپنے گھر گئے ہیں۔‘‘

ڈاکٹر اکھلیش کا کہنا ہے کہ یہ پہلا معاملہ نہیں ہے جب نریندر مودی نے بہار اور بہاری عوام کے ساتھ دھوکہ کیا ہے۔ اس سے قبل بھی کئی بار دھوکے دیے گئے ہیں اور یہی کام ان کے ساتھی نتیش کمار بھی کر رہے ہیں۔ کانگریس لیڈر نے کہا کہ ’’انہی سب وجوہات سے بہار مستقل پچھڑتا جا رہا ہے، اور آج ہر معاملے میں ریاست آخری پائیدان پر کھڑی ہے۔‘‘

اس پریس کانفرنس سے کانگریس کے میڈیا کوآرڈنیٹر ابھے دوبے نے بھی خطاب کیا۔ انھوں نے کہا کہ ’’آج مکمل بہار تکلیف میں مبتلا ہے۔ بی جے پی حکومت نے مسافروں کو ریل سفر میں بے پناہ مشقتیں دیں۔ بی جے پی حکومت نے چھٹھ تہوار پر بہاریوں کے ساتھ دھوکہ کیا ہے۔‘‘ وہ مزید کہتے ہیں کہ ’’نریندر مودی کے ساتھ بی جے پی کے تمام لیڈران نے کہا کہ ہم 12 ہزار ٹرینیں چلائیں گے۔ لیکن 22 اکتوبر کو انڈین ریلوے نے پریس نوٹ جاری کر کہا کہ— ہم 1500 خصوصی ٹرینیں چلا رہے ہیں۔ اگلے 5 دنوں میں ہم روزانہ 300 ٹرین چھٹھ تہوار کے لیے چلائیں گے۔‘‘ اپنی بات کو آگے بڑھاتے ہوئے کانگریس لیڈر نے کہا کہ ’’اگر مان لیا جائے کہ ہر ایک ٹرین میں 16 ڈبے ہوں، تو مسافروں کی تعداد تقریباً 20 لاکھ ہوگی۔ لیکن بہار کے اہم ’ایسٹ سنٹرل ریلوے زون‘ کا 2024 والا بیان دیکھیں تو اس میں کہا گیا تھا کہ چھٹھ پوجا کے دوران ہم نے 40 لاکھ مسافر ہینڈل کیے۔ اب سوال ہے کہ باقی زون کا نمبر کیا ہوگا؟‘‘

مودی حکومت کو ہدف تنقید بناتے ہوئے ابھے دوبے نے کہا کہ ’’مودی حکومت کے دعوے بہت ہیں، لیکن ہم سب نے دیکھا کہ لوگ سفر کے دوران کتنے پریشان رہے۔ خود نریندر مودی سمیت تمام لیڈران ہزاروں کروڑ کے جہاز میں گھومتے ہیں، لیکن عوام بھیڑ میں سفر کرنے کو مجبور ہے۔‘‘ ساتھ ہی وہ کہتے ہیں کہ ’’بہار میں مذہبی جذبات کو چوٹ پہنچانے والوں کو عوام معاف نہیں کرے گی۔ عوام ’ووٹ کی چوٹ‘ سے انھیں سبق سکھائے گی، اور اقتدار سے اکھاڑ پھینکے گی۔‘‘