بدایوں میں جشن، سدھی جین نے پاس کیا این ڈی اے کا امتحان، شہر پہنچنے پر شاندار استقبال

اترپردیش کے بدایوں کی بیٹی سدھی جین نے نیشنل ڈیفنس اکیڈمی (این ڈی اے) کا امتحان پاس کر کے پورے ملک بالخصوص ریاست میں اپنے شہر کا نام روشن کیا ہے۔ سدھی جین اس سال این ڈی اے کے لیے منتخب ہونے والی 18 لڑکیوں میں سے ایک ہے لیکن سدھی اس لیے زیادہ خاص ہے کیونکہ اس کو اکیڈمی میں صدر جمہوریہ کے ذریعہ کانسے کے تمغے سے نوازا گیا ہے۔

سدھی جین ٹریننگ کے بعد اپنے آبائی قصبہ اوجھانی  پہنچی اور میڈیا سے این ڈی اے میں کانسہ کا تمغہ حاصل کرنے کے تجربات شیئر کیے۔ بتا دیں کہ سدھی وہ پہلی خاتون ہیں جنہیں این ڈی اے میں صدر سے کانسے کا تمغہ حاصل ہوا ہے۔ گھر پہنچنے پر سدھی کا شہر میں پرتپاک استقبال کیا گیا۔ نیشنل ڈیفنس اکیڈمی کے نتائج کے بعد جو تصویر سامنے آئی ہے اس نے بدایوں اور پوری ریاست اتر پردیش کا سر فخر سے اونچا کر دیا ہے۔

ضلع بدایوں کے قصبہ اوجھانی کے رہنے والے نکھل جین کی 3 بیٹیاں ہیں۔ وہ پیشے کے اعتبار سے پرائمری اسکول ٹیچر ہیں اور ان کی بیوی بھی اسکول میں ٹیچر ہیں۔ نکھل جین کی سب سے بڑی بیٹی سدھی جین نے این ڈی اے میں اپنی پہلی کوشش میں ہی صدر سے کانسے کا تمغہ حاصل کرنے والی پہلی خاتون کیڈٹ کا اعزاز حاصل کر لیا۔ جب سدھی جین اپنے آبائی شہر اوجھانی پہنچی تو جگہ جگہ اس کا شاندار استقبال کیا گیا۔ اس کے چاہنے والوں نے اسے پھولوں کے ہار اور مٹھائی سے خوش آمدید کہا اور مستقبل کے لیے نیک تمناؤں کا اظہار کیا۔

سدھی جین کی اس کامیابی سے جہاں پورے شہر کو اس پر فخر ہے وہیں دوسری طرف اس کے گھر والوں کا بھی کہنا ہے کہ وہ اس سب کا سہرا سدھی کے اساتذہ اور اس کی محنت کے سر باندھنا چاہیں گے۔ این ڈی اے میں بہترین خاتون کیڈٹ کے لیے صدر کانسے کا تمغہ حاصل کرنے والی سدھی جین کو 2022 میں این ڈی اے کے لیے منتخب کیا گیا تھا۔ اس سال امتحان کے نتائج کا اعلان کیا گیا۔ اس کی پاسنگ آؤٹ پریڈ 28 نومبر کو ہوئی جس میں اسے بہترین خاتون کیڈٹ کے طور پر منتخب کیا گیا۔

گزشتہ ماہ کی 30 تاریخ کو سدھی جین نے آرمی چیف ایڈمرل دنیش ترپاٹھی سے صدر کانسے کا تمغہ حاصل کیا۔ فی الحال سدھی ڈی سی سی (ڈویژن کیڈٹ کمیشن) ہے، اب اس کی ایک سال کی ٹریننگ حیدرآباد میں ہوگی، اس کے بعد اس کی ٹریننگ مکمل ہوجائے گی۔