سی بی ایس ای بورڈ امتحانات منسوخ؟ وائرل سرکلر فرضی نکلا، صرف کچھ ممالک میں امتحانات ملتوی

نئی دہلی: مرکزی ثانوی تعلیمی بورڈ (سی بی ایس ای) کے نام سے سوشل میڈیا پر گردش کرنے والا وہ سرکلر فرضی قرار دیا گیا ہے جس میں دعویٰ کیا گیا تھا کہ مشرقِ وسطیٰ کے ممالک میں دسویں اور بارہویں جماعت کے بورڈ امتحانات منسوخ کر دیے گئے ہیں۔ بورڈ نے واضح کیا ہے کہ امتحانات منسوخ نہیں کیے گئے بلکہ موجودہ حالات کے پیش نظر چند ممالک میں عارضی طور پر ملتوی کیے گئے ہیں۔

وائرل سرکلر میں کہا گیا تھا کہ عالمی غیر معمولی حالات اور ایران۔اسرائیل تنازع کے سبب مشرقِ وسطیٰ میں سی بی ایس ای کے باقی ماندہ زبان کے پرچے اور سات مارچ کو مقرر سماجی علوم کا امتحان منسوخ کر دیا گیا ہے اور طلبہ کو داخلی جائزے اور پری بورڈ کی بنیاد پر نمبر دے دیے جائیں گے۔ تاہم بورڈ نے اس دعوے کو مکمل طور پر گمراہ کن قرار دیا ہے۔

سی بی ایس ای کے مطابق رواں سال مجموعی طور پر 43 لاکھ 67 ہزار 870 طلبہ بورڈ امتحانات میں شریک ہیں۔ دسویں اور بارہویں جماعت کے امتحانات 17 فروری سے ہندوستان سمیت 26 ممالک میں شروع ہوئے تھے۔ پہلے دن دسویں جماعت کا ریاضی اور بارہویں جماعت کا بایو ٹیکنالوجی کا پرچہ منعقد ہوا تھا۔ اب تک بیشتر امتحانات پُرامن طور پر مکمل ہو چکے ہیں۔

بورڈ نے اعلان کیا ہے کہ بحرین، ایران، کویت، عمان، قطر، سعودی عرب اور متحدہ عرب امارات میں دو مارچ کو مقرر امتحانات عارضی طور پر ملتوی کیے گئے ہیں۔ یہ فیصلہ خطے میں کشیدگی اور سکیورٹی صورتِ حال کو دیکھتے ہوئے کیا گیا ہے۔ نئی تاریخوں کا اعلان حالات کا جائزہ لینے کے بعد کیا جائے گا۔

امتحانی نگران ڈاکٹر سنیم بھاردواج نے کہا ہے کہ تین مارچ کو صورتِ حال کا دوبارہ جائزہ لیا جائے گا اور پانچ مارچ سے طے شدہ امتحانات کے بارے میں مناسب فیصلہ کیا جائے گا۔ بورڈ نے طلبہ، والدین اور اسکولوں سے اپیل کی ہے کہ وہ صرف سرکاری ویب سائٹ اور مستند ذرائع سے معلومات حاصل کریں۔

سی بی ایس ای نے خبردار کیا ہے کہ افواہیں پھیلانا قابلِ تعزیر عمل ہو سکتا ہے اور سائبر ذرائع سے غلط معلومات عام کرنے والوں کے خلاف کارروائی کی جا سکتی ہے۔ متعلقہ ممالک میں ہندوستانی سفارت خانوں اور قونصل خانوں کو بھی امتحانات ملتوی کیے جانے کی باضابطہ اطلاع دے دی گئی ہے تاکہ طلبہ کو درست رہنمائی فراہم کی جا سکے۔