پانچ اسمبلی سیٹوں پر ضمنی انتخابات مکمل، کیرالہ میں سب سے زیادہ اور پنجاب میں سب سے کم ووٹنگ

نئی دہلی: چار ریاستوں کی پانچ اسمبلی سیٹوں پر ہونے والے ضمنی انتخابات کا عمل جمعرات کو مکمل ہو گیا، جس میں کیرالہ کی نیلمبور سیٹ پر سب سے زیادہ 73.26 فیصد ووٹنگ ریکارڈ کی گئی، جبکہ پنجاب کی لدھیانہ ویسٹ سیٹ پر سب سے کم 51.33 فیصد ووٹ پڑے۔ الیکشن کمیشن نے جمعرات کی شام تمام سیٹوں پر ووٹنگ کے پرامن اختتام کی تصدیق کی۔

الیکشن کمیشن کے مطابق اس بار کئی نئی سہولیات کو تجرباتی طور پر آزمایا گیا جن میں تمام پولنگ اسٹیشنز پر موبائل فون جمع کرانے کی سہولت، ووٹنگ کی مکمل ویب کاسٹنگ اور ووٹنگ کے اعداد و شمار کی فوری اپ ڈیٹ شامل ہیں۔ کمیشن کا کہنا ہے کہ یہ اقدامات کامیاب ثابت ہوئے ہیں اور مستقبل میں ان کو دیگر انتخابات میں نافذ کیا جا سکتا ہے۔

گجرات کی دو سیٹوں، ویساوادر اور کڈی، پر بالترتیب 54.61 اور 54.49 فیصد ووٹنگ ہوئی۔ ان میں ویساوادر سیٹ عام آدمی پارٹی کے ایم ایل اے کے استعفیٰ کے باعث خالی ہوئی تھی، جبکہ کڈی سیٹ بی جے پی کے رکن اسمبلی کرسن بھائی سولنکی کے انتقال کے بعد خالی ہوئی۔ ان دونوں سیٹوں پر بی جے پی، کانگریس اور عام آدمی پارٹی کے امیدواروں کے درمیان سہ رخی مقابلہ ہے۔

مغربی بنگال کی کالی گنج اسمبلی سیٹ پر 69.85 فیصد ووٹنگ ہوئی۔ یہاں ترنمول کانگریس، بی جے پی اور کانگریس-بائیں اتحاد کے درمیان سخت مقابلہ دیکھا گیا۔ اس سیٹ پر ترنمول کانگریس نے علیفہ احمد کو میدان میں اتارا ہے، جو کہ متوفی ایم ایل اے ناصرالدین احمد کی بیٹی ہیں۔

پنجاب کی لدھیانہ ویسٹ سیٹ پر سب سے کم یعنی 51.33 فیصد ووٹنگ ریکارڈ ہوئی۔ یہ سیٹ عام آدمی پارٹی کے ایم ایل اے گرپریت بسی گوگی کی موت کے بعد خالی ہوئی تھی۔ پارٹی نے صنعتکار اور راجیہ سبھا رکن سنجیو اروڑہ کو اپنا امیدوار بنایا ہے جن کا مقابلہ بی جے پی کے جیون گپتا اور کانگریس کے سابق وزیر بھارت بھوشن آشو سے ہے۔

کیرالہ کی نیلمبور سیٹ پر دیہی اور شہری علاقوں میں صبح سے ہی ووٹروں کی لمبی قطاریں دیکھی گئیں۔ تکنیکی مسائل کے باوجود ووٹنگ کا عمل مجموعی طور پر پرامن رہا۔ یہاں 10 امیدوار میدان میں ہیں جن میں یو ڈی ایف، ایل ڈی ایف، بی جے پی اور ایس ڈی پی آئی شامل ہیں۔ اس سیٹ پر گزشتہ انتخاب میں کامیاب ہونے والے آزاد امیدوار پی وی انور نے ترنمول کانگریس میں شامل ہونے کے بعد استعفیٰ دے دیا تھا اور اب وہ ترنمول کے امیدوار کے طور پر انتخاب لڑ رہے ہیں۔

ان تمام سیٹوں کے لیے ووٹوں کی گنتی 23 جون کو کی جائے گی، جس کے بعد واضح ہوگا کہ عوام نے کس پر اعتماد ظاہر کیا۔

(ان پٹ: یو این آئی)