جبل پور میں ڈرائیور کی لاپروائی سے بس پلٹی، 3 کی موت، 25 افراد زخمی

ملک میں ایک اور سڑک حادثے کا قہر دیکھنے کو ملا۔ مدھیہ پردیش کے جبل پور میں آج صبح ایک درناک سڑک حادثے میں جبل پور سے ناگپور جا رہی ایک پرائیویٹ بس پلٹ گئی۔ اس حادثے میں 3 لوگوں نے اپنی جانیں گنوا دیں جبکہ 25 دیگر افراد زخمی ہو گئے۔ اس سلسلے میں جانکاری دیتے ہوئے پولیس افسر نے بتایا کہ یہ واقعہ صبح تقریباً 4 بجے بیرگی تھانہ علاقہ کے رمن پور گھاٹی علاقے میں پیش آیا۔

پولیس افسر نے آگے کہا کہ بس ایودھیا (اتر پردیش) سے ناگپور (مہاراشٹر) جا رہی تھی۔ انہوں نے بتایا کہ شروعاتی جانچ میں پتہ چلا ہے کہ ڈرائیور کو جھپکی آنے کی وجہ سے یہ حادثہ ہوا۔ حادثے میں دو مسافروں کی موت موقع پر ہی ہو گئی جبکہ شدید طور سے زخمی ایک خاتون نے سونی ضلع کے لکھنادون میں علاج کے دوران دم توڑ دیا۔ باقی زخمیوں میں سے کچھ کو لکھنا دون اور کچھ کو جبل پور کے اسپتالوں میں داخل کرایا گیا ہے۔ کئی زخمی کی حالت نازک بتائی جا رہی ہے۔ حادثے میں مرنے والوں کی شناخت حیدر آباد باشندہ مالمّا (45)، ناگپور باشندہ شوبھم میشرام (28) اور امول کھوڑے (42) کے طور پر ہوئی ہے۔

پولیس افسروں نے ابتدائی جانچ میں پایا کہ یہ حادثہ بس ڈرائیور کی لاپروائی سے ہوا۔ ڈرائیور کو جھپکی آ گئی تھی جس کی وجہ سے بس پر سے اس کا توازن بگڑ گیا اور بس حادثہ کی شکار ہو گئی۔ حادثے کی سنگینی کو دیکھتے ہوئے انتظامیہ نے فوری طور پر راحت و بچاؤ کام شروع کر دیا۔ پولیس نے اس سلسلے میں معاملہ درج کرکے جانچ شروع کر دی ہے۔ ساتھ ہی یہ یقینی کرنے کے لیے ہدایت جاری کی ہے کہ سڑک تحفظاتی ضابطوں پر عمل کیا جائے اور طویل دوری کے بس ڈرائیوروں کی مستعدی کو یقینی بنایا جاسکے۔