دہلی میں بم کی دھمکیوں کا سلسلہ جاری، کئی اسکولوں میں ہنگامی صورتِ حال

دہلی میں اسکولوں کو مل رہی بم دھمکیوں کا سلسلہ مسلسل جاری ہے۔ جمعہ (13 فروری) کی صبح ایک بار پھر راجدھانی کے کئی نامور اسکولوں کو بم سے اڑانے کی دھمکی ملی، جس کے بعد کافی ہلچل مچ گئی۔ صبح 9:13 بجے پہلی کال جھنڈے والان میں واقع بی ڈی تمل ایجوکیشن اسکول میں آئی، جس میں اسکول کی حدود میں بم ہونے کی اطلاع دی گئی۔ اس کے فوراً بعد دیگر اسکولوں کو بھی اسی طرح کی دھمکیاں ملنے کی خبریں سامنے آئیں۔

بم کی اطلاع ملتے ہی دہلی پولیس کی ٹیمیں، فائر بریگیڈ اور بم ڈسپوزل اسکواڈ جائے وقوعہ پر پہنچے۔ پولیس افسران نے وقت ضائع کیے بغیر اسکول کی عمارتوں کو خالی کروانا شروع کیا اور بڑے پیمانے پر تلاشی مہم شروع کر دی۔ سیکورٹی ایجنسیاں اسکول کی عمارتوں کے ساتھ ساتھ آس پاس کے علاقوں کی بھی باریک بینی سے جانچ کر رہی ہیں۔ فی الحال کسی بھی اسکول سے مشتبہ چیز ملنے کی تصدیق نہیں ہوئی ہے، تاہم تحقیقات کا عمل مکمل چوکسی کے ساتھ جاری ہے۔

واضح رہے کہ اسکول انتظامیہ نے احتیاطاً فوری طور پر کلاسیں بند کر دیں اور بچوں کو بحفاظت باہر نکالا۔ والدین کو فوری اطلاع دے کر بلایا گیا، جبکہ کئی اسکولوں نے بچوں کو بسوں اور نجی گاڑیوں کے ذریعے بحفاظت گھر بھیجنے کا انتظام کیا۔ اچانک ملنے والی اس اطلاع سے والدین میں تشویش کی لہر دوڑ گئی، لیکن پولیس اور اسکول انتظامیہ نے یقین دہانی کرائی کہ سیکورٹی کے تمام معیارات پر سختی سے عمل کیا جا رہا ہے اور کسی بھی قسم کی لاپرواہی نہیں برتی گئی ہے۔

دہلی پولیس نے معاملے کو سنجیدگی سے لیتے ہوئے دھمکی کے ذرائع کا پتہ لگانے کی کارروائی شروع کر دی ہے۔ سائبر ٹیم بھی کال کی لوکیشن اور دیگر تکنیکی پہلوؤں کی جانچ کر رہی ہے۔ افسران کا کہنا ہے کہ فی الحال صورتحال قابو میں ہے اور تحقیقات مکمل ہونے کے بعد ہی واضح معلومات سامنے آئیں گی۔