راکیش ٹکیت کو فیملی سمیت بم سے اڑانے کی ملی دھمکی، امت شاہ کو خط لکھ کر اپنے لیے ملک بھر میں سیکورٹی کا کیا مطالبہ

بھارتیہ کسان یونین کے لیڈر راکیش ٹکیت اور ان کے کنبہ کو بم سے اڑانے کی دھمکی ملی ہے۔ یہ دھمکی موبائل پر فون کر کے دی گئی ہے۔ دھمکی میں بھارتیہ کسان یونین کے قومی صدر نریش ٹکیت اور ترجمان راکیش ٹکیت کو کسان تحریک سے الگ ہونے کی تنبیہ کی گئی ہے۔ اس دھمکی کے بعد نریش ٹکیت کے بیٹے گورو ٹکیت نے بھورکلاں تھانہ میں شکایت درج کرائی ہے۔

شکایت کے بعد پولیس معاملے کی جانچ میں مصروف ہو گئی ہے۔ ان دھمکیوں کو لے کر کسان لیڈر راکیش ٹکیت نے مرکزی وزیر داخلہ امت شاہ کو خط لکھ کر اپنے لیے ملک بھر میں سیکورٹی دینے کا مطالبہ کیا ہے۔ ٹکیت نے وزیر داخلہ سے مطالبہ کیا ہے کہ اتر پردیش کے علاوہ دیگر ریاستوں میں بھی ان کی سیکورٹی کے پختہ انتظام کیے جائیں اور وزارت داخلہ کے ذریعہ اس دھمکی معاملے کی جانچ کرائی جائے۔

امت شاہ کو لکھے خط میں راکیش ٹکیت نے کہا کہ گورو ٹکیت کو فون کرنے والے شخص نے کہا کہ آپ نے دہلی میں کسان تحریک چلائی جو ٹھیک نہیں تھا۔ کسانوں کی بات کرنا بند کرو اور پیچھے ہٹ جاؤ۔ پیچھے نہیں ہٹے تو پورے کنبہ کو بم سے اڑا دیا جائے گا۔ راکیش ٹکیت نے اپنے خط میں کہا کہ پورا کنبہ کسانوں اور سماج کی لڑائی لڑتا رہے گا اور پورے ملک میں یاترا بھی کرتا رہے گا۔

موصولہ اطلاعات کے مطابق دھمکی بھرا فون بھارتیہ کسان یونین کے قومی صدر نریش ٹکیت کے بیٹے گورو ٹکیت کے موبائل پر آیا تھا۔ گورو نے تھانہ میں دی اپنی شکایت میں کہا کہ انھیں سات بار دھمکی بھرا فون آیا۔ انھوں نے کہا کہ پہلے ان لوگوں نے اسے شرارت سمجھا، لیکن بار بار فون آنے پر کنبہ کے لوگ سنجیدہ ہو گئے اور اس کے بعد تھانے میں اس بارے میں شکایت درج کرائی گئی۔

اپنی شکایت میں گورو ٹکیت نے کہا کہ ہولی کے دن 8 مارچ کو رات 9.15 بجے سے 10.00 بجے تک کئی فون آئے۔ فون کرنے والے نے کسانوں کی بات کرنے کو لے کر پورے ٹکیت کنبہ کو نازیبا الفاظ کہے اور جان سے مارنے کی دھمکی دی۔ گورو ٹکیت نے الزام لگایا ہے کہ فون کرنے والے نے ٹیکسٹ میسج پر گالی گلوچ بھی کی۔