احمد آباد حادثہ: ایئر انڈیا کے تباہ شدہ طیارے کا بلیک باکس اور وائس ریکارڈر برآمد، حادثے کی وجہ جلد معلوم ہونے کا امکان

احمد آباد انٹرنیشنل ایئرپورٹ پر پیش آئے اندوہناک طیارہ حادثے میں اہم پیش رفت ہوئی ہے۔ حادثے کا شکار ہونے والے ایئر انڈیا کے بوئنگ 787-8 ڈریم لائنر طیارے کا ایک بلیک باکس اور کاک پٹ وائس ریکارڈر مل گیا ہے، جبکہ دوسرے بلیک باکس کی تلاش جاری ہے۔ ماہرین کا ماننا ہے کہ ان آلات کی مدد سے یہ معلوم ہو سکے گا کہ ٹیک آف کے فوراً بعد طیارہ کیوں اور کیسے گر کر تباہ ہوا۔

ایئر انڈیا نے تصدیق کی ہے کہ یہ حادثہ جمعرات 12 جون کو ایک بجکر 38 منٹ پر پیش آیا، جب فلائٹ نمبر اے آئی-171 لندن کے لیے روانہ ہو رہی تھی۔ پرواز میں 242 افراد سوار تھے جن میں سے 241 افراد کے جاں بحق ہونے کی تصدیق ہو چکی ہے۔ صرف ایک مسافر زندہ بچ سکا ہے، جو کہ ہند نژاد برطانوی شہری ہے اور اس کا علاج جاری ہے۔

حادثے کے بعد طیارے کا ایک بڑا حصہ قریبی سِول اسپتال کے ڈاکٹروں کے ہاسٹل سے ٹکرا گیا، جس کے باعث عمارت بری طرح متاثر ہوئی اور وہاں بھی 24 افراد کے مارے جانے کی اطلاع ہے۔ یوں مجموعی طور پر ہلاکتوں کی تعداد 265 ہو گئی ہے۔

وزیر اعظم نریندر مودی نے جمعے کو حادثے کی جگہ کا دورہ کیا، زخمیوں سے ملاقات کی اور گجرات کے سابق وزیر اعلیٰ وجے روپانی کے خاندان سے تعزیت کی۔

بعد ازاں، انہوں نے ایئرپورٹ پر ریاستی وزراء اور اعلیٰ حکام کے ساتھ ایک ہنگامی اجلاس بھی کیا اور اب وہ دہلی واپس روانہ ہو چکے ہیں۔

ماہرین کا کہنا ہے کہ بلیک باکس اور وائس ریکارڈر سے حاصل شدہ معلومات حادثے کی اصل وجہ کے تعین میں فیصلہ کن کردار ادا کریں گی، جس کے بعد ایوی ایشن سکیورٹی اور پروٹوکول پر بھی نظرثانی متوقع ہے۔