لائسنس کی آڑ میں بی جے پی حکومت کر رہی استحصال، شہری دیہاتوں میں چھوٹے کاروباریوں میں بے چینی: دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے بی جے پی کی قیادت والی دہلی میونسپل کارپوریشن (ایم سی ڈی) پر سخت تنقید کرتے ہوئے کہا کہ دہلی کے شہری دیہاتوں میں چلنے والے چھوٹے کاروباروں کو لائسنس کے نوٹس دے کر ان سے زبردستی پیسے وصول کیے جا رہے ہیں۔ ان کے مطابق، لائسنس فیس سے کئی گنا زیادہ رقم جبراً وصول کی جا رہی ہے اور یہ سب کچھ ایک منظم غیر قانونی کاروبار کی شکل اختیار کر چکا ہے۔

دیویندر یادو کا کہنا تھا کہ بی جے پی 27 سال قبل بھی لائسنس راج کے ذریعے شہری دیہاتوں میں لوگوں کو پریشان کرتی تھی اور اب پھر اسی ہتھکنڈے کو استعمال کر کے وہاں کے چھوٹے تاجروں اور کاروباریوں کو ہراساں کیا جا رہا ہے۔ انہوں نے خدشہ ظاہر کیا کہ لائسنس کے بہانے اب سیلنگ کا خطرہ بھی منڈلا رہا ہے، جس سے لوگوں کی روزی روٹی پر براہِ راست اثر پڑ رہا ہے۔

انہوں نے کہا کہ نہ عام آدمی پارٹی اور نہ ہی بی جے پی کی حکومت نے دہلی کے دیہاتوں کو کبھی سنجیدگی سے لیا۔ پچھلے 12 برسوں سے دیہی دہلی کی صورتحال جوں کی توں ہے۔ دیہاتوں میں نہ نکاسی آب کا مناسب بندوبست ہے، نہ بنیادی سہولتیں موجود ہیں۔

انہوں نے مزید کہا کہ انہی دیہاتیوں کی زمینیں حکومت نے کوڑیوں کے دام پر حاصل کیں لیکن اب لال ڈورے کے دائرے میں رہنے والے ان ہی لوگوں کو اپنے معمولی کاروبار کے لیے بھی تنگ کیا جا رہا ہے۔ دیویندر یادو نے کہا کہ اگر کوئی دیہاتی طے شدہ فیس کے ساتھ لائسنس لینا چاہے تو وہ درست ہے لیکن لائسنس کی آڑ میں جبری وصولی بی جے پی کی غیر اخلاقی سیاست اور ایم سی ڈی افسران کی من مانی کو ظاہر کرتی ہے۔

انہوں نے یہ بھی کہا کہ پچھلی عام آدمی پارٹی حکومت نے دیہاتوں کے ترقیاتی منصوبوں کو صرف انتخابات کے وقت ہتھیار بنایا اور جھوٹے دعوے کیے، اب بی جے پی کی ریکھا گپتا حکومت بھی لائسنس کی آڑ میں سیلنگ کے خطرے سے دیہاتیوں کو خوفزدہ کر رہی ہے۔

ان کا مزید کہنا تھا کہ بی جے پی نے جھگی والوں کو ان کی موجودہ جگہ پر بسائے رکھنے کا وعدہ کیا تھا، مگر اب دیہاتوں اور جھگی بستیوں کو برباد کر کے وہ کیسی ترقی یافتہ دہلی بنانا چاہتے ہیں؟

دیویندر یادو نے حکومت پر تنقید کرتے ہوئے کہا کہ راشن کارڈ بند ہو چکے ہیں، 20 نکاتی پروگرام کے تحت دیے گئے پلاٹوں کی ملکیت واضح نہیں اور لینڈ پولنگ جیسے اہم مسائل پر پچھلی حکومت مکمل طور پر ناکام رہی ہے۔ ریکھا گپتا کی قیادت میں موجودہ حکومت بھی دیہاتوں کے لیے کچھ نہیں کر رہی۔ ہاؤس ٹیکس، ٹیوب ویل اور تھری فیز بجلی کنکشن پر پابندیوں سے دیہاتیوں کو مزید نقصان پہنچ رہا ہے۔

انہوں نے مطالبہ کیا کہ دیہاتیوں کو فوری طور پر لائسنس کے نام پر ہراسانی سے نجات دی جائے اور دہلی کے شہری دیہاتوں میں چھوٹے کاروباروں کے لیے ایک شفاف اور سہل نظام نافذ کیا جائے۔